കണ്ണിന് ചികിത്സ; ആറ്റിങ്ങല്‍ ഇരട്ടക്കൊലക്കേസ് പ്രതി അനുശാന്തിക്ക് രണ്ട് മാസത്തെ പരോള്‍

ആറ്റിങ്ങല്‍ ഇരട്ട കൊലപാതക കേസിലെ പ്രതി അനുശാന്തിക്ക് കണ്ണിന്റെ ചികിത്സയ്ക്കായി സുപ്രീം കോടതി രണ്ട് മാസത്തെ പരോള്‍ അനുവദിച്ചു. എന്നാല്‍ തിരുവനന്തപുരം റവന്യു ജില്ലയില്‍ പ്രവേശിക്കില്ല എന്ന സത്യവാങ്മൂലം നല്‍കാന്‍ അനുശാന്തിയോട് സുപ്രീം കോടതി നിര്‍ദേശിച്ചു. സംസ്ഥാന സര്‍ക്കാരിന്റെ എതിര്‍പ്പ് അവഗണിച്ചാണ് അനുശാന്തിക്ക് സുപ്രീം കോടതി പരോള്‍ അനുവദിച്ചത്. മൂന്നര വയസ്സുള്ള സ്വന്തം മകളെയും, ഭര്‍തൃമാതാവിനെയും കൊലപ്പെടുത്തിയ കേസിലെ പ്രതിയാണ് അനുശാന്തിയെന്ന് സംസ്ഥാന സര്‍ക്കാരിന് വേണ്ടി ഹാജരായ സ്റ്റാന്റിംഗ് കോണ്‍സല്‍ സി കെ ശശി വാദിച്ചു. ഗുരുതരമായ ക്രൂരകൃത്യമാണ് നടത്തിയത്. ജയിലില്‍ ചികത്സ നല്‍കുന്നുണ്ട്. അതിനാല്‍ പരോള്‍ അനുവദിക്കരുത് എന്നും സംസ്ഥാന സര്‍ക്കാര്‍ ആവശ്യപ്പെട്ടു. എന്നാല്‍ കഴിഞ്ഞ എട്ട് വര്‍ഷമായി അനുശാന്തിക്ക് പരോള്‍ ലഭിക്കുന്നില്ല എന്ന് അഭിഭാഷകന്‍ വി കെ ബിജു സുപ്രീംകോടതിയില്‍ വ്യക്താക്കി. ഒരു കണ്ണിന്റെ കാഴ്ച്ച പൂര്‍ണമായും നഷ്ടപ്പെട്ടു. ഇനിയും വൈകിയാല്‍ രണ്ടാമത്തെ കണ്ണിന്റെ കാഴ്ചയും നഷ്ടമാകും. പരോള്‍ അനുവദിച്ച് നാട്ടിലെത്തിയാല്‍ ക്രമസമാധാന വിഷയങ്ങള്‍ ഉണ്ടാകും എന്ന സര്‍ക്കാര്‍ വാദം തെറ്റാണെന്നും അഭിഭാഷകന്‍ കോടതിയില്‍ പറഞ്ഞു.