പ്രസവത്തെ തുടര്‍ന്ന് യുവതി മരിച്ചു; ചികിത്സാ പിഴവെന്ന് പരാതി

പ്രസവത്തെ തുടര്‍ന്നു യുവതി മരിച്ചതില്‍ ചികിത്സാ പിഴവെന്ന് ആരോപണം. കൊല്ലം ഡീസന്റ്മുക്ക് സ്വദേശിനി ചാന്ദന (27) ആണ് വെള്ളിയാഴ്ച പുലര്‍ച്ചെ വിക്ടോറിയ ആശുപത്രിയില്‍ മരിച്ചത്. പുലര്‍ച്ചെ ആശുപത്രിയില്‍ ആണ്‍കുഞ്ഞിനു ജന്മം നല്‍കിയ ചാന്ദനയെ രക്തസ്രാവം ഉണ്ടായതിനെ തുടര്‍ന്നു സ്വകാര്യ മെഡിക്കല്‍ കോളജ് ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. വിക്ടോറിയ ആശുപത്രിയില്‍ ജൂനിയര്‍ ഡോക്ടറാണ് ഉണ്ടായിരുന്നതെന്നും മണിക്കൂറുകളോളം കൃത്യമായ ചികിത്സ നല്‍കാതെ വീഴ്ച വരുത്തിയെന്നുമാണു പരാതി. ചാന്ദനെയെ മുന്‍പു നോക്കിയിരുന്ന ഡോക്ടറും പ്രസവമുറിയില്‍ ഉണ്ടായിരുന്നില്ല. അമ്മ മരിച്ചതിനു തൊട്ടുപിന്നാലെ കുഞ്ഞിനെ ആശുപത്രിയില്‍ നിന്ന് ഡിസ്ചാര്‍ജ് ചെയ്തുവെന്നും ആരോപണമുണ്ട്. തൃക്കോവില്‍വട്ടം ഗ്രാമപഞ്ചായത്ത് പ്രസിഡന്റിന്റെ നേതൃത്വത്തില്‍ ജനപ്രതിനിധികള്‍ ആശുപത്രിയിലെത്തി പ്രതിഷേധിച്ചു. അന്വേഷണം നടത്തി കുറ്റക്കാര്‍ക്കാരെ ജോലിയില്‍ നിന്നു പുറത്താക്കണമെന്ന് ജനപ്രതിനിധികള്‍ ആവശ്യപ്പെട്ടു. എന്നാല്‍ സംഭവത്തില്‍, വീഴ്ചയില്ലെന്നാണ് ആശുപത്രി സൂപ്രണ്ട് ഉള്‍പ്പെടെയുളളവരുടെ വിശദീകരണം.