വിവാഹസമയത്ത് സ്ത്രീധന വിഷയം ചര്‍ച്ചയായാല്‍ ശക്തമായ നടപടിയുണ്ടാകും, സ്ത്രീകള്‍ പ്രതികരിക്കണം; മുഖ്യമന്ത്രി

വിവാഹസമയത്ത് സ്ത്രീധന വിഷയം ചര്‍ച്ച ചെയുന്നുണ്ടെകില്‍ അതിനെതിരെ പ്രതികരിക്കാന്‍ സ്ത്രീകള്‍ തയ്യാറാകണമെന്ന് മുഖ്യമന്ത്രി പിണറായി വിജയന്‍. സ്ത്രീധന വിഷയങ്ങളില്‍ സര്‍ക്കാരിന്റെ ഭാഗത്ത് നിന്ന് ശക്തമായ നടപടി ഉണ്ടാകുമെന്നും മുഖ്യമന്ത്രി പറഞ്ഞു. കുടുംബശ്രീയുടെ നേതൃത്വത്തിലുള്ള സ്ത്രീധന-സ്ത്രീപീഡന വിരുദ്ധ ബോധവത്കരണത്തിന് തുടക്കം കുറിച്ച് സംസാരിക്കുകയായിരുന്നു മുഖ്യമന്ത്രി. ഇന്ന് മുതല്‍ വനിതാ ദിനമായി മാര്‍ച്ച് 8 വരെ നീളുന്ന സ്ത്രീപക്ഷ നവകേരള പ്രചാരണത്തിനാണ് മുഖ്യമന്ത്രി തുടക്കം കുറിച്ചത്. സ്ത്രീധനം അടക്കമുള്ള തിന്മകള്‍ക്കെതിരെ പ്രതികരിച്ചാല്‍ സര്‍ക്കാര്‍ ഒപ്പം നില്‍ക്കുമെന്നാണ് മുഖ്യമന്ത്രി നല്‍കുന്ന ഉറപ്പ്. കുടുബശ്രീ പോലെ അതിവിപുലമായ പ്രസ്ഥാനത്തിലൂടെ സ്ത്രീധന വിരുദ്ധ ക്യാമ്പയിന്‍ വിജയകരമാക്കാന്‍ സാധിക്കുമെന്ന് തദ്ദേശ സ്വയംഭരണ വകുപ്പ് മന്ത്രി എം വി ഗോവിന്ദന്‍ പറഞ്ഞു. ക്യാമ്പയിനിന്റെ സംസ്ഥാന തല ഉദ്ഘാടനനത്തിന്റെ ഭാഗമായി 152 ബ്ലോക്കുകളില്‍ നടപ്പാക്കുന്ന ക്രൈം മാപ്പിങ് പദ്ധതിയും, സ്‌നേഹിത ജന്‍ഡര്‍ ഹെല്പ് ഡെസ്‌കിന്റെ ടോള്‍ ഫ്രീ നമ്പര്‍ പ്രഖ്യാപനവും ചടങ്ങില്‍ നടന്നു.