പള്ളികളിലെ ആരാധന; ഓര്‍ത്തഡോക്‌സ് വിഭാഗത്തിന്റെ ഹര്‍ജി ഹൈക്കോടതി ഇന്ന് പരിഗണിക്കും

കൊച്ചി: സുപ്രീംകോടതി ഉത്തരവിന്റെ അടിസ്ഥാനത്തില്‍ പത്ത് പള്ളികളില്‍ ആരാധന നടത്താന്‍ പൊലീസ് സംരക്ഷണം തേടി ഓര്‍ത്തഡോക്‌സ് വിഭാഗം സമര്‍പ്പിച്ച ഹര്‍ജി ഹൈക്കോടതി ഇന്ന് പരിഗണിക്കും. പരസ്പരധാരണയിലെത്താനുള്ള സാധ്യതകളെത്രയെന്ന് ഈ ഹര്‍ജിയിലാണ് ജസ്റ്റിസ് ദേവന്‍ രാമചന്ദ്രന്‍ യാക്കോബായ ഓര്‍ത്തഡോക്‌സ് വിഭാഗങ്ങളോട് ആരാഞ്ഞത്. പാത്രയാര്‍ക്കിസ് ബാവയെ അംഗീകരിക്കുന്നെന്നും എന്നാല്‍, മലങ്കര സഭയുടെ തലവനായി മലങ്കരയിലെ കാതോലിക്ക ബാവയെ അംഗീകരിക്കണമെന്നും ഓര്‍ത്തഡോക്‌സ് വിഭാഗം ആവശ്യപ്പെട്ടിരുന്നു. പള്ളികള്‍ക്ക് സുരക്ഷ നല്‍കുന്നതുമായി ബന്ധപ്പെട്ട് സ്വീകരിച്ച നടപടികള്‍ സംബന്ധിച്ച് സര്‍ക്കാരും ഇന്ന് വിശദീകരിക്കും. ഇതിനിടെ, കോതമംഗലം പള്ളിയുമായി ബന്ധപ്പെട്ട കേസ് ഹൈക്കോടതി ഡിവിഷന്‍ ബെഞ്ചും പരിഗണിക്കുന്നുണ്ട്. സുപ്രീംകോടതി വിധിയുടെ അടിസ്ഥാനത്തില്‍ കോതമംഗലം പള്ളി ഓര്‍ത്തഡോക്‌സ് വിഭാഗത്തിന് കൈമാറണമെന്നും ക്രമസമാധാന പ്രശ്‌നങ്ങള്‍ നിയന്ത്രിക്കാന്‍ സിആര്‍പിഎഫിനെ ചുമതലപ്പെടുത്തണമെന്നും സിംഗിള്‍ ബെഞ്ച് നേരത്തെ ഉത്തരവിട്ടിരുന്നു. ഇത് ചോദ്യം ചെയ്ത് സംസ്ഥാന സര്‍ക്കാര്‍ സമര്‍പ്പിച്ച അപ്പീലാണ് ഡിവിഷന്‍ ബെഞ്ചിന് മുന്നിലുള്ളത്. പള്ളികള്‍ക്ക് മേലുള്ള നിയന്ത്രണാവകാശം നിശ്ചയിക്കാന്‍ ഹിതപരിശോധന നടത്താന്‍ ഉദ്ദേശിക്കുന്നുണ്ടോയെന്ന് വ്യക്തമാക്കാന്‍ നേരത്തെ സംസ്ഥാന സര്‍ക്കാരിനോട് ആവശ്യപ്പെട്ടിരുന്നു. നിയമപരിഷ്‌കരണ കമ്മീഷന്‍ ചെയര്‍മാന്‍ ജസ്റ്റിസ് കെടി തോമസിന്റെ ഈ ശുപാര്‍ശ സംബന്ധിച്ച് സര്‍ക്കാര്‍ ഇന്ന് നിലപാട് അറിയിക്കും