സമാധാനം നിലനിര്‍ത്തണം; ആലപ്പുഴയില്‍ പൊലീസിന് വീഴ്ച സംഭവിച്ചിട്ടില്ല: സജി ചെറിയാന്‍

ആലപ്പുഴയില്‍ സമാധാനം നിലനിര്‍ത്താന്‍ സര്‍വകക്ഷി സമാധാന യോഗത്തില്‍ ആഹ്വാനം. കൊലപാതകങ്ങളുടെ പേരില്‍ ഇനി അനിഷ്ഠ് സംഭവം ഉണ്ടാകാന്‍ പാടില്ലെന്ന് മന്ത്രി സജി ചെറിയാന്‍ പറഞ്ഞു. പ്രതികളെ നിയമത്തിന് മുന്നില്‍ കൊണ്ടുവരുമെന്ന് മന്ത്രിമാര്‍ വ്യക്തമാക്കി. ഗൂഢാലോചനക്കാരെയും നിയമത്തിന് മുന്നില്‍ കൊണ്ടുവരും. വയലാറിലെ കൊലപാതകത്തിന്റെ തുടര്‍ച്ചയാണോ ഷാനിന്റെ കൊലപാതകമെന്ന് അന്വേഷിക്കും. പൊലീസിന് വീഴ്ച സംഭവിച്ചിട്ടില്ലെന്നും മന്ത്രി സജി ചെറിയാന്‍ പറഞ്ഞു. സമാധാനം നിലനിര്‍ത്താന്‍ എല്ലാ കക്ഷികളും പ്രാദേശിക ക്യാമ്പെയിന്‍ നടത്തണം. ഇക്കാര്യത്തില്‍ എല്ലാ കക്ഷികളും സഹകരിക്കുമെന്ന് ഉറപ്പു നല്‍കിയതായി മന്ത്രി പി പ്രസാദ് വ്യക്തമാക്കി. പൊലീസിനെ മാനസികമായി ശക്തിപ്പെടുത്താനാണ് എല്ലാവരും ശ്രമിക്കേണ്ടത്. രാഷ്ട്രീയ പാര്‍ട്ടികള്‍ സമാധാനത്തിനു പ്രത്യേക യോഗം വിളിക്കും. മതപരമായ പ്രശ്‌നം ഉണ്ടാകാതിരിക്കാന്‍ ജാഗ്രത പുലര്‍ത്തുമെന്നും അതില്‍ എല്ലാ പാര്‍ട്ടികളും സഹകരിച്ചിട്ടുണ്ടെന്നും മന്ത്രി പി പ്രസാദ് പറഞ്ഞു. ആരും പരസ്പരം ചെളിവാരി എറിയുന്ന തരത്തില്‍ പ്രസ്താവനകള്‍ നടത്തരുത്, എല്ലാവരും സമാധാനം നിലനിര്‍ത്താന്‍ സഹകരിക്കണം. അന്വേഷണത്തില്‍ ഒരു വിട്ടുവീഴ്ചയും ഉണ്ടാകില്ല. ഇരു കൊലപാതകങ്ങള്‍ക്കും പിന്നിലെ ഗൂഢാലോചനകളില്‍ പങ്കാളികളായവരെയും നിയമത്തിനു മുന്നില്‍ കൊണ്ടുവരുമെന്ന് സര്‍ക്കാര്‍ വ്യക്തമാക്കി.