സമൂഹമാധ്യമങ്ങള്‍ വഴി ഹൈക്കോടതിക്കെതിരായ വിമര്‍ശനം; മുന്‍ മജിസ്ട്രേറ്റിനെതിരെ നടപടിക്ക് ഉത്തരവിട്ട് ഹൈക്കോടതി

സമൂഹമാധ്യമങ്ങള്‍ വഴി ഹൈക്കോടതിയെ വിമര്‍ശിച്ച സംഭവത്തില്‍ മുന്‍ മജിസ്ട്രേറ്റ് എസ് സുദീപിനെതിരെ നിയമാനുസൃത നടപടി സ്വീകരിക്കാന്‍ ഹൈക്കോടതി ഉത്തരവ്. രജിസ്ട്രാര്‍ക്ക് ഇത് സംബന്ധിച്ച് നിര്‍ദേശം നല്‍കി. ചീഫ് ജസ്റ്റിസിന്റെ അനുമതിയോടെ വേണം നടപടി സ്വീകരിക്കാന്‍. സുദീപ് വ്യക്തിപരമായി ആക്ഷേപിക്കുന്നതില്‍ തനിക്ക് പരാതി ഇല്ലെന്ന് ജസ്റ്റിസ് ദേവന്‍ രാമചന്ദ്രന്‍. എന്നാല്‍ കേസുകളില്‍ ഇടപെടാന്‍ അനുവദിക്കില്ല. സ്വയം രക്തസാക്ഷിയാകാനാണ് സുദീപ് ശ്രമിക്കുന്നതെന്നും ഫേസ്ബുക്ക് പോസ്റ്റുകള്‍ വഴി അന്വേഷണത്തെ തടസപെടുത്താന്‍ ശ്രമിച്ചാല്‍ കോടതി ഇടപെടും എന്ന് ജസ്റ്റിസ് ദേവന്‍ രാമചന്ദ്രന്‍ ചൂണ്ടിക്കാട്ടി. സുദീപ് നേരിട്ട് ഹാജരാകാന്‍ പുറപ്പെടുവിച്ച സമന്‍സ് ഹൈകോടതി റദ്ദാക്കി. ജൂലൈ ആറിനാണ് എസ് സുദീപ് രാജിവയ്ക്കുന്നത്. ഫേസ്ബുക്ക് പോസ്റ്റിന്റെ പേരില്‍ പെരുമ്പാവൂര്‍ സബ് ജഡ്ജിയായിരുന്ന എസ് സുദീപിനെ പിരിച്ചുവിടാന്‍ ഹൈക്കോടതി ശുപാര്‍ശ ചെയ്തിരുന്നു. ഇതിന് പിന്നാലെയാണ് സുദീപ് രാജിവയ്ക്കുന്നത്.