സി.പി.എമ്മിലെ മുസ്ലിങ്ങളെ എസ്ഡിപിഐക്കാരാക്കാന്‍ ശ്രമം -കോടിയേരി

ന്യൂനപക്ഷങ്ങള്‍ സി.പി.എമ്മിലേക്ക് എത്തുന്നത് തടയാന്‍ ആസൂത്രിത പ്രചാരണങ്ങളാണ് നടക്കുന്നതെന്ന് സംസ്ഥാനസെക്രട്ടറി കോടിയേരി ബാലകൃഷ്ണന്‍. പാര്‍ട്ടിയിലെ മുസ്ലിങ്ങളെ എസ്.ഡി.പി.ഐ.ക്കാരാക്കുന്നു. ക്ഷേത്രങ്ങളുമായി ബന്ധപ്പെടുന്ന പാര്‍ട്ടി അംഗങ്ങളെ ആര്‍.എസ്.എസായി ചിത്രീകരിക്കുന്നു. മുസ്ലിങ്ങളെല്ലാം എസ്.ഡി.പി.ഐ.ക്കാരാണെന്ന് ധരിക്കരുതെന്നും കോടിയേരി പറഞ്ഞു. എച്ച്. സലാം എം.എല്‍.എ.ക്ക് എസ്.ഡി.പി.ഐ. ബന്ധം ആരോപിച്ചുള്ള അസംബന്ധം അവതരിപ്പിക്കാന്‍ ബി.ജെ.പി.ക്കു മാത്രമേ കഴിയൂ. എസ്.ഡി.പി.ഐ.ക്കാര്‍ സി.പി.എമ്മില്‍ നുഴഞ്ഞുകയറുന്നുവെന്ന പ്രചാരണം തെറ്റാണ്. എറണാകുളം ജില്ലയിലെ ഒരു സഖാവ് ഉന്നയിച്ച ആരോപണം തെറ്റായിപ്പോയെന്ന് അദ്ദേഹംതന്നെ പാര്‍ട്ടിയെ അറിയിച്ചിട്ടുണ്ട്. ആലപ്പുഴ കൊലപാതകങ്ങളില്‍ പോലീസിനോ ഇന്റലിജന്‍സിനോ വീഴ്ചയില്ല. ഉന്നതതല ഗൂഢാലോചനയുടെ ഭാഗമാണ് രണ്ടും. വത്സന്‍ തില്ലങ്കേരിക്കെതിരേ ഉയര്‍ന്ന ആരോപണങ്ങളും പരിശോധിക്കപ്പെടണം. എതിര്‍പ്പുകള്‍ക്ക് കീഴ്പ്പെട്ട് കെ-റെയില്‍ പദ്ധതിയില്‍നിന്ന് പിന്മാറില്ല. ശാസ്ത്രസാഹിത്യപരിഷത്ത് പദ്ധതിയെയല്ല എതിര്‍ക്കുന്നത്. ചില പരിസ്ഥിതിപ്രശ്‌നങ്ങളാണ് ചൂണ്ടിക്കാട്ടിയത്. അത് പരിഗണിച്ചാണ് സര്‍ക്കാര്‍ പദ്ധതി നടപ്പാക്കുന്നത്. താലിബാന്‍മോഡല്‍ സന്ദേശം ആലപ്പുഴയില്‍ ആര്‍.എസ്.എസ്. നേതാവ് കൊല്ലപ്പെട്ടപ്പോള്‍ ആഹ്ലാദപ്രകടനം നടത്തുമെന്ന് പ്രഖ്യാപിക്കുന്ന എസ്.ഡി.പി.ഐ. നേതാവ് നല്‍കുന്ന സന്ദേശം താലിബാന്‍ മാതൃകയിലുള്ളതാണ്. ഇത്തരം പ്രചാരണങ്ങള്‍ പോലീസ് പരിശോധിക്കുന്നുണ്ട്- കോടിയേരി പറഞ്ഞു. ഘടകകക്ഷി തര്‍ക്കം: സഹികെട്ടാല്‍ പുറത്താക്കും ഘടകകക്ഷികളിലെ പ്രശ്‌നങ്ങള്‍ ഇടതുമുന്നണിയുടെ കെട്ടുറപ്പിനെ ബാധിച്ചിട്ടില്ല. ഇടപെടേണ്ട സാഹചര്യത്തില്‍ ഇടപെടും. സഹികെട്ടാല്‍ പുറത്താക്കുമെന്നും കോടിയേരി പറഞ്ഞു. മുന്നണി വിശാലമാകുമ്പോള്‍ ചില പ്രശ്‌നങ്ങളുണ്ടാകും. മുന്നണിയില്‍ ഇടതുപാര്‍ട്ടികള്‍ക്കു തന്നെയാണ് ശക്തി. അതനുസരിച്ച് മുന്നണി നിലപാടെടുക്കും. സി.പി.എം. വിട്ട് കണ്ണൂരിലടക്കം ഒരുവിഭാഗം സി.പി.ഐ.യില്‍ ചേര്‍ന്നതിനെക്കുറിച്ച്, അത് വ്യക്തിപരമായ ഇഷ്ടമാണെന്നായിരുന്നു പ്രതികരണം. ഇടുക്കിയില്‍ എം.എം.മണി-എസ്. രാജേന്ദ്രന്‍ തര്‍ക്കം ഗൗരവമുള്ളതല്ല. രാജേന്ദ്രന്‍ ഇപ്പോഴും പാര്‍ട്ടിയില്‍ത്തന്നെയുണ്ടെന്നും കോടിയേരി പറഞ്ഞു. എല്‍.ജെ.ഡി.യില്‍നിന്ന് രാജിവെച്ച ഷെയ്ക് പി. ഹാരിസ് സി.പി.എമ്മില്‍ പ്രവര്‍ത്തിക്കാന്‍ താത്പര്യപ്പെട്ട് കത്ത് തന്നിട്ടുണ്ട്. എല്‍.ജെ.ഡി. പിളര്‍ന്നിട്ടില്ല. പിളര്‍ത്തി ഏതെങ്കിലും വിഭാഗത്തെ സി.പി.എമ്മിനോടു ചേര്‍ക്കാന്‍ ആഗ്രഹിക്കുന്നില്ല. എല്‍.ജെ.ഡി.യിലെ പ്രശ്‌നങ്ങള്‍ ആ പാര്‍ട്ടിയിലെ നേതൃത്വംതന്നെ പരിഹരിക്കാന്‍ ശ്രമിക്കുന്നുണ്ടെന്നും കോടിയേരി പറഞ്ഞു. കുഞ്ഞിരാമന്റെ സ്മൃതിയില്‍ കൂട്ടായ്മ തലശ്ശേരി കലാപകാലത്ത് കൊല്ലപ്പെട്ട യു.കെ. കുഞ്ഞിരാമന്റെ ഓര്‍മദിനമായ ജനുവരി നാലിന് സി.പി.എം. എല്ലാ ലോക്കല്‍തലത്തിലും ബഹുജന കൂട്ടായ്മ സംഘടിപ്പിക്കും. പാര്‍ട്ടി കോണ്‍ഗ്രസിനുള്ള സ്വാഗതസംഘം രൂപവത്കരണം ജനുവരി 14-ന് കണ്ണൂരില്‍ നടക്കുമെന്നും കോടിയേരി പറഞ്ഞു.