അന്വേഷിക്കാനെത്തിയ പൊലീസിനെ ആക്രമിച്ചു; എസ്‌ഐയുടെ കാലൊടിഞ്ഞു, 2 പേര്‍ അറസ്റ്റില്‍

പന്തളത്ത് പരാതി അന്വേഷിക്കാനെത്തിയ പൊലീസ് ഉദ്യോഗസ്ഥര്‍ക്കു നേരെ ആക്രമണം. എസ്‌ഐയുടെ കാലൊടിഞ്ഞു. രണ്ടു പൊലീസുകാര്‍ക്ക് പരുക്കേറ്റു. സംഭവത്തില്‍ രണ്ടുപേരെ അറസ്റ്റ് ചെയ്തു. കുളനട സ്വദേശി മനു, അഞ്ചല്‍ സ്വദേശി രാഹുല്‍ എന്നിവരാണ് അറസ്റ്റിലായത്. പന്തളം കുളനടയ്ക്കു സമീപത്തുള്ള മാന്തുക എന്ന സ്ഥലത്ത് അയല്‍വീട്ടുകാര്‍ തമ്മിലുള്ള വഴക്ക് അന്വേഷിക്കാന്‍ പോയ പൊലീസുകാര്‍ക്കു നേരെയാണ് ആക്രമണമുണ്ടായത്. മനുവും ബന്ധു രാഹുലും ചേര്‍ന്ന് ആക്രമിക്കുകയായിരുന്നെന്നാണു പൊലീസുകാര്‍ പറയുന്നത്. പന്തളം സ്റ്റേഷന്‍ എസ്‌ഐ ഗോപന്‍, ഡ്രൈവര്‍ രാജേഷ്, ക്യാംപില്‍നിന്നുള്ള സിവില്‍ പൊലീസ് ഉദ്യോഗസ്ഥന്‍ വിജിന്‍ എന്നിവര്‍ക്കാണു പരുക്കേറ്റത്. ഗോപന്റെ കാലിനും ഡ്രൈവര്‍ രാജേഷിന്റെ കൈയ്ക്കും പൊട്ടലുണ്ട്. കൂടുതല്‍ പൊലീസുകാരെത്തിയാണു പ്രതികളെ കീഴ്‌പ്പെടുത്തിയത്. രണ്ട് പ്രതികളും പന്തളം സ്റ്റേഷനിലുണ്ട്. ഇരുവരും മദ്യലഹരിയിലായിരുന്നു എന്നാണു പൊലീസ് പറയുന്നത്.