കോട്ടയം നഗരത്തില്‍ മദ്യപന്റെ അഴിഞ്ഞാട്ടം; സ്ത്രീയെ തലയ്ക്കടിച്ചു, വെട്ടുകത്തി വീശി

നഗരമധ്യത്തില്‍ വഴിപോക്കരെയും പൊലീസിനെയും ആക്രമിച്ച് മദ്യപന്‍. ഒപ്പമുണ്ടായിരുന്ന സ്ത്രീയെയും തടയാനെത്തിയ ആളെയും തലയ്ക്കടിച്ചുവീഴ്ത്തി. പൊലീസിന്റെ കണ്‍മുന്നിലായിരുന്നു അക്രമം. ബലം പ്രയോഗിച്ചാണ് അക്രമിയെ കീഴടക്കിയത്. തടയാനെത്തിയവര്‍ക്കു നേരെ ഇയാള്‍ വെട്ടുകത്തി വീശി.ശനിയാഴ്ച ഉച്ചയ്ക്ക് ഒരു മണിയോടെയായിരുന്നു സംഭവം. അക്രമം നടത്തിയ ആളുടെ പേര് ബാബു എന്നാണ്. ഇയാളും ഭാര്യയും തിരുനക്കര മൈതാനത്തോടു ചേര്‍ന്നു റോഡരികിലാണു താമസം. അവിടെ മദ്യപിച്ച ശേഷം ഭാര്യയെ ആക്രമിക്കുകയായിരുന്നു. തുടര്‍ന്ന് നാട്ടുകാര്‍ ഇടപെട്ടു. പ്രതി വെട്ടുകത്തിയുമായി ഭാര്യയെ വെട്ടാന്‍ ശ്രമിച്ചു. തുടര്‍ന്ന് ആളുകളുടെ നേരെ തിരിഞ്ഞു. കണ്‍ട്രോള്‍ റൂമിലേക്കു ഫോണ്‍ ചെയ്തിട്ടും നടപടിയെടുക്കാന്‍ വൈകിയ പൊലീസിനെതിരെ പ്രതിഷേധമുയര്‍ന്നു. പൊലീസെത്തിയാണ് അക്രമിയെ പ്രദേശത്തുനിന്ന് മാറ്റിയത്. പൊലീസിനെയും ഇയാള്‍ ആക്രമിക്കാന്‍ ശ്രമിച്ചു.