ബൂസ്റ്റര്‍ ഡോസ്: നല്‍കുന്നത് ആദ്യം സ്വീകരിച്ച അതേ വാക്സിന്‍

രാജ്യത്ത് ജനുവരി 10 മുതല്‍ മുന്‍ കരുതല്‍ ഡോസ് നല്‍കി തുടങ്ങുമെന്ന് ആരോഗ്യ മന്ത്രാലയം. ആദ്യം സ്വീകരിച്ച അതേ വാക്സിനാകും ബൂസ്റ്റര്‍ ഡോസായി ലഭിക്കുക. വാക്സിനുകള്‍ സംയോജിപ്പിച്ച് ഉപയോഗിക്കുന്നത് വെല്ലൂര്‍ മെഡിക്കല്‍ കോളജില്‍ നടന്ന പഠനങ്ങളുടെ അന്തിമ വിശകലനത്തിന് ശേഷമായിരിക്കുമെന്ന് സര്‍ക്കാര്‍ അറിയിച്ചു. മൂന്ന് കോടി ആരോഗ്യപ്രവര്‍ത്തകര്‍ക്കും മറ്റ് രോഗങ്ങള്‍ ഉള്ള മുതിര്‍ന്ന പൗരന്മാര്‍ക്കുമാണ് മുന്‍ കരുതല്‍ ഡോസ് നല്‍കുന്നത്. ശനിയാഴ്ച രാത്രി പത്ത് മണിയോടെ രാജ്യത്തെ അഭിസംബോധന ചെയ്ത് സംസാരിക്കുന്നതിനിടെയാണ് പ്രധാനമന്ത്രി രാജ്യത്ത് ബൂസ്റ്റര്‍ ഡോസിനും അനുമതി നല്‍കിയ കാര്യം അറിയിക്കുന്നത്. കൊവിഡ് മുന്‍നിര പോരാളികള്‍ക്ക് ബൂസ്റ്റര്‍ ഡോസ് ജനുവരി 10 മുതല്‍ ആരംഭിക്കുമെന്ന് പ്രധാനമന്ത്രി അറിയിച്ചു. 60 വയസ് കഴിഞ്ഞവര്‍ക്കും അനുബന്ധ രോഗങ്ങള്‍ ഉള്ളവര്‍ക്കും ബൂസ്റ്റര്‍ ഡോസ് ലഭിക്കും. കുട്ടികള്‍ക്കുള്ള വാക്സിനേഷനെ കുറിച്ചും അറിയിച്ചു. പതിനഞ്ചിനും പതിനെട്ടിനും ഇടയില്‍ പ്രായമുള്ള കുട്ടികളിലാണ് കൊവിഡ് വാക്സിന് അനുമതി നല്‍കിയത്. കുട്ടികള്‍ക്കുള്ള കൊവിഡ് വാക്സിന് ഡിസിജിഐ അനുമതി നല്‍കിയിരുന്നു. ഭാരത് ബയോട്ടെക്കിന്റെ കോവാക്സിനാണ് അനുമതി ലഭിച്ചത്. ഇതോടെ ഇന്ത്യയില്‍ കുട്ടികള്‍ക്ക് ഉപയോഗിക്കാന്‍ അനുമതി ലഭിച്ച രണ്ടാമത്തെ വക്സിനായി കോവാക്സിന്‍. 28 ദിവസത്തെ ഇടവേളയിലാണ് കുട്ടികളില്‍ കൊവിഡ് വാക്സിന്‍ നല്‍കുന്നത്. മുതിര്‍ന്നവരിലും ഇതേ ഇടവേളയിലാണ് കൊവിഡ് വാക്സിന്‍ നല്‍കുന്നത്. നേരത്തെ സൈഡസ് കാഡിലയുടെ വാക്സിന്‍ 12 വയസിന് മുകളിലുള്ള കുത്തികളില്‍ ഉപയോഗിക്കാന്‍ അനുമതി ലഭിച്ചിരുന്നു.