‘സില്‍വര്‍ലൈന്‍ സമഗ്രവികസനത്തിനു മുതല്‍ക്കൂട്ട്; ചിലര്‍ അട്ടിമറിക്കാന്‍ ശ്രമിക്കുന്നു’

കേരളത്തിന്റെ ഗതാഗത മേഖലയില്‍ മാത്രമല്ല, സമഗ്രവികസനത്തിനു തന്നെ മുതല്‍ക്കൂട്ടായി മാറുന്ന പദ്ധതിയാണ് സില്‍വര്‍ ലൈനെന്ന് മുഖ്യമന്ത്രി പിണറായി വിജയന്‍. നിരവധി തെറ്റിദ്ധാരണാജനകമായ വാര്‍ത്തകള്‍ പരത്തി പദ്ധതിയെ അട്ടിമറിക്കാന്‍ ഉള്ള ശ്രമങ്ങള്‍ പലരും നടത്തി വരുന്നുണ്ടെന്ന് സമൂഹമാധ്യത്തിലെ കുറിപ്പില്‍ അദ്ദേഹം വ്യക്തമാക്കി. എന്നാല്‍, പൊതുസമൂഹം അത്തരക്കാരുടെ പൊള്ളത്തരം തിരിച്ചറിയുന്നു എന്നതാണ് യാഥാര്‍ഥ്യം. നാടിന്റെ പുരോഗതിക്ക് അനുഗുണമായ സുസ്ഥിരവും സുരക്ഷിതവും ആയ വികസന പ്രവര്‍ത്തനങ്ങള്‍ക്കു തുരങ്കം വയ്ക്കാനുള്ള ശ്രമങ്ങളെ പരാജയപ്പെടുത്തിയ ചരിത്രമാണ് നമ്മുടേത്. സില്‍വര്‍ ലൈന്‍ പദ്ധതിയെക്കുറിച്ചുള്ള വസ്തുതകള്‍ മനസ്സിലാക്കി അതിന്റെ വിജയത്തിനായി ഒരുമിച്ച് നില്‍ക്കാമെന്നും മുഖ്യമന്ത്രി വ്യക്തമാക്കി.