മകരവിളക്ക് മഹോത്സവം: ശബരിമല നട ഇന്ന് വൈകിട്ട് തുറക്കും

മകരവിളക്ക് മഹോത്സവത്തിനായി ശബരിമല നട ഇന്ന് വൈകിട്ട് തുറക്കും. നാളെ മുതല്‍ മാത്രമേ ഭക്തര്‍ക്ക് ദര്‍ശനത്തിന് അനുമതിയുള്ളൂ. പരമ്പരാഗത കാനന പാതയും നാളെ തുറന്ന് കൊടുക്കും. ജനുവരി 14നാണ് മകരവിളക്ക് മഹോത്സവം. തിരുവാഭരണ ഘോഷയാത്ര 12 ന് പന്തളത്ത് നിന്ന് പുറപ്പെടും. 13ന് എരുമേലിയില്‍ പേട്ടതുള്ളല്‍ നടക്കും. 19 വരെ ഭക്തര്‍ക്ക് ദര്‍ശനത്തിനുള്ള സൗകര്യമുണ്ട്. പ്രതിദിനം 50,000 പേര്‍ക്ക് വെര്‍ച്വല്‍ ക്യൂ മുഖേനയും 10,000 പേര്‍ക്ക് സ്‌പോര്‍ട് ബുക്കിങ്ങിലൂടെയും പ്രവേശനം അനുവദിക്കും. എരുമേലിയില്‍ നിന്ന് കരിമല വഴിയുള്ള പരമ്പരാഗത പാത തുറക്കുന്നതോടെ കൂടുതല്‍ തീര്‍ത്ഥാടകര്‍ എത്തുമെന്നാണ് ദേവസ്വം ബോര്‍ഡ് പ്രതീക്ഷിക്കുന്നത്. മണ്ഡലക്കാലം 11 ലക്ഷം തീര്‍ഥാടകരാണ് സന്നിധാനത്ത് എത്തിയത്. മകരവിളക്ക് കാലം കൂടി തീരുന്നതോടെ വരുമാനം 100 കോടി കവിയുമെന്നാണ് പ്രതീക്ഷ.