ലോഡ്ജില്‍വെച്ച് നഗ്‌നചിത്രം പകര്‍ത്തി, പ്രചരിപ്പിക്കുമെന്ന് ഭീഷണി; ലക്ഷങ്ങള്‍ തട്ടിയ യുവതി അറസ്റ്റില്‍

തൃശ്ശൂര്‍ : സ്വകാര്യനിമിഷങ്ങള്‍ വെളിപ്പെടുത്തുമെന്നും കേസില്‍ കുടുക്കുമെന്നും ഭീഷണിപ്പെടുത്തി പണവും സ്വര്‍ണവും കവര്‍ന്ന യുവതി അറസ്റ്റില്‍. ചേലക്കര ഐശ്വര്യനഗര്‍ ചിറയത്ത് സിന്ധു (37)വിനെയാണ് ഈസ്റ്റ് പോലീസ് സ്റ്റേഷന്‍ എസ്.എച്ച്.ഒ. പി. ലാല്‍കുമാറും സംഘവും അറസ്റ്റുചെയ്തത്. പാലക്കാട് ചന്ദ്രനഗര്‍ സ്വദേശിയെയാണ് ഭീഷണിപ്പെടുത്തിയത്. സാമൂഹികമാധ്യമം വഴിയാണ് ഇവര്‍ പരിചയപ്പെട്ടത്. തുടര്‍ന്ന് തൃശ്ശൂരില്‍ വെച്ച് കണ്ടുമുട്ടുകയും ചെയ്തു. ഈ സമയത്ത് പോലീസില്‍ പരാതിപ്പെടുമെന്നും അപമാനിക്കുമെന്നും ഭീഷണിപ്പെടുത്തി, സ്വര്‍ണ ഏലസും സ്വര്‍ണമാലയും ലോക്കറ്റും അടക്കം മൂന്നരപ്പവന്‍ സ്വര്‍ണാഭരണങ്ങള്‍ നിര്‍ബന്ധിച്ച് ഊരിവാങ്ങുകയും ചെയ്തു. പിന്നീട് ഷൊര്‍ണൂരിലെ ഒരു ലോഡ്ജിലേക്കും ഇയാളെ വിളിച്ചുവരുത്തി. അവിടെവെച്ച് പരാതിക്കാരന്റെ നഗ്‌നചിത്രങ്ങള്‍ മൊബൈലില്‍ പകര്‍ത്തുകയും ചെയ്തു. ഇത് സാമൂഹികമാധ്യമങ്ങളില്‍ പ്രചരിപ്പിക്കുമെന്നും കുടുംബാംഗങ്ങള്‍ക്കും സുഹൃത്തുക്കള്‍ക്കും അയച്ചുകൊടുക്കുമെന്നും ഭീഷണിപ്പെടുത്തി. കൈവശമുണ്ടായിരുന്ന 1,75,000 രൂപ നിര്‍ബന്ധിച്ച് കൈക്കലാക്കുകയും ചെയ്തു. അതിനുശേഷം യുവതി ഇയാളെ ടെലഫോണില്‍ ബന്ധപ്പെട്ട് പത്ത് ലക്ഷം രൂപകൂടി ആവശ്യപ്പെട്ടു. തുടര്‍ന്ന് ഈസ്റ്റ് പോലീസില്‍ പരാതിപ്പെടുകയായിരുന്നു. യുവതിയെ പരാതിക്കാരനെക്കൊണ്ട് തൃശ്ശൂരിലേക്ക് വിളിച്ചുവരുത്തിയാണ് പോലീസ് പിടികൂടിയത്. പ്രതിയുടെ മൊബൈല്‍ഫോണില്‍നിന്ന് ഇരുവരും തമ്മിലുള്ള വാട്‌സാപ്പ് ചാറ്റുകളും ശബ്ദസന്ദേശങ്ങളും ചിത്രങ്ങളും പോലീസ് കണ്ടെടുത്തു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.