‘അര്‍ച്ചന’യും പുതുവര്‍ഷത്തിലെത്തുന്നു; ഐശ്വര്യ ലക്ഷ്മി ചിത്രത്തിന്റെ റിലീസ് പ്രഖ്യാപിച്ചു

ഐശ്വര്യ ലക്ഷ്മി നായികയായെത്തുന്ന ചിത്രം 'അര്‍ച്ചന 31 നോട്ട് ഔട്ട്' ഫെബ്രുവരി 4 ന് തീയേറ്ററുകളില്‍. ഐശ്വര്യ ലക്ഷ്മിയാണ് റിലീസ് അറിയിച്ചുള്ള പോസ്റ്റര്‍ പങ്കുവെച്ചത്. അഖില്‍ അനില്‍കുമാര്‍ സംവിധാനം ചെയ്യുന്ന ചിത്രത്തിന്റെ ഫോട്ടോകള്‍ മുന്‍പും സമൂഹ മാധ്യമങ്ങളിലൂടെ പ്രേക്ഷകര്‍ ഏറ്റെടുത്തിരുന്നു. ഇപ്പോള്‍ ചിത്രത്തിന്റെ റിലീസ് കൂടി പ്രഖ്യാപിച്ചിരിക്കുകയാണ്. ഒരു കല്യാണത്തെ ചുറ്റിപ്പറ്റിയുള്ള കഥയാണ് 'അര്‍ച്ചന 31 നോട്ട് ഔട്ട്' പറയുന്നത്. 31 വിവാഹാലോചനകളിലൂടെ കടന്നുപോയ പ്രൈമറി സ്‌കൂള്‍ അധ്യാപികയായിട്ടാണ് ചിത്രത്തില്‍ ഐശ്വര്യ ലക്ഷ്മി അഭിനയിക്കുന്നത്. മാര്‍ട്ടിന്‍ പ്രക്കാട്ട്, സിബി ചവര, രഞ്ജിത്ത് നായര്‍ എന്നിവര്‍ ചേര്‍ന്നാണ് ചിത്രം നിര്‍മ്മിക്കുന്നത്. ജോ പോള്‍ ആണ് ചിത്രത്തിന്റെ ഗാനരചന നിര്‍വഹിച്ചിരിക്കുന്നത്. 'അര്‍ച്ചന 31 നോട്ട് ഔട്ടി'ല്‍ ഇന്ദ്രന്‍സും പ്രധാന കഥാപാത്രത്തില്‍ എത്തുന്നു. ജോയല്‍ ജോജി ആണ് ചിത്രത്തിന്റെ ഛായാഗ്രാഹകന്‍. ചിത്രം പുറത്തു വരുന്നതില്‍ ഏറെ സന്തോഷമുണ്ടെന്നും ജീവിതത്തിലെ മറ്റൊരു നാഴികല്ലായി ഇത് മാറുമെന്നും പോസ്റ്റര്‍ പങ്കുവച്ചുകൊണ്ട് തരാം പറഞ്ഞു.