ആശങ്ക പടര്‍ത്തി ഒമിക്രോണ്‍; പുതുവത്സര ആഘോഷമില്ല, മുംബൈയില്‍ നിയന്ത്രണം

ഒമിക്രോണ്‍ വ്യാപനം രൂക്ഷമായതോടെ മുംബൈ നഗരത്തില്‍ നിയന്ത്രണങ്ങള്‍ കടുപ്പിച്ചു. ബീച്ചുകള്‍, പൊതു മൈതാനങ്ങള്‍, കടല്‍ത്തീരം, പാര്‍ക്ക് തുടങ്ങിയ പൊതു സ്ഥലങ്ങളില്‍ വൈകിട്ട് 5 മുതല്‍ പുലര്‍ച്ചെ അഞ്ച് വരെ ആളുകള്‍ പ്രവേശിക്കുന്നത് വിലക്കി. വെള്ളിയാഴ്ച ഉച്ചതിരിഞ്ഞ് ഒന്ന് മുതല്‍ ജനുവരി 15 വരെയാണ് വിലക്കേര്‍പ്പെടുത്തി മുംബൈ പൊലീസ് ഉത്തരവ് ഇറക്കിയത്. ഒമിക്രോണ്‍ ആശങ്കാജനകമായ രീതിയില്‍ വ്യാപിക്കുകയാണെന്നും പൊലീസ് പുറത്തിറക്കിയ കുറിപ്പില്‍ പറയുന്നു. 24 മണിക്കൂറിനിടെ 5,368 പേര്‍ക്കാണ് മഹാരാഷ്ട്രയില്‍ കോവിഡ് സ്ഥിരീകരിച്ചത്. 198 പേര്‍ക്ക് ഒമിക്രോണ്‍ ബാധിച്ചു. രോഗികളുടെ എണ്ണത്തില്‍ 37 ശതമാനം വര്‍ധന. മഹാരാഷ്ട്ര മുഖ്യമന്ത്രി ഉദ്ധവ് താക്കറെയുടെ അധ്യക്ഷതയില്‍ വ്യാഴാഴ്ച കോവിഡ് കര്‍മസമിതി യോഗം ചേര്‍ന്നു. കോവിഡ് ബാധിതരായ 37 ശതമാനം പേരും യാത്ര ചെയ്യാത്തവരാണ്. ബ്രിഹാന്‍മുംബൈ മുനിസിപ്പല്‍ കോര്‍പ്പറേഷനില്‍ 375 സാംപിള്‍ പരിശോധിച്ചതില്‍ 141 പേര്‍ക്ക് കോവിഡ് സ്ഥിരീകരിച്ചു. ഇതില്‍ ഒരാള്‍ക്കു പോലും യാത്രാ പശ്ചാത്തലം ഇല്ല. മുംബൈയില്‍ 153 പേര്‍ക്ക് ഒമിക്രോണ്‍ സ്ഥിരീകരിച്ചതില്‍ 12 പേര്‍ മാത്രമാണ് രാജ്യാന്തര യാത്ര നടത്തിയവര്‍.