പമ്പ ഹില്‍ടോപ്പില്‍ മകരജ്യോതി ദര്‍ശനത്തിന് അനുമതി; സൗകര്യങ്ങള്‍ ഒരുക്കും

പമ്പ ഹില്‍ടോപ്പില്‍ മകരജ്യോതി ദര്‍ശനത്തിന് അനുമതിയായി. 14ന് വൈകിട്ട് 6.30ന് തിരുവാഭരണം ചാര്‍ത്തി ദീപാരാധനയ്ക്കു ശേഷമാണ് മകരജ്യോതി ദര്‍ശനം. പമ്പയില്‍ അയ്യപ്പന്മാര്‍ക്കു ശരിയായി മകരജ്യോതി കാണാന്‍ കഴിയുന്നത് ഹില്‍ടോപ്പില്‍ ആണ്. അവിടെ പരമാവധി സൗകര്യങ്ങള്‍ ഒരുക്കി മകരജ്യോതി ദര്‍ശനത്തിനു തീര്‍ഥാടകരെ അനുവദിക്കും. മകരജ്യോതി കാണാവുന്ന മറ്റു കേന്ദ്രങ്ങളായ നീലിമല, അപ്പാച്ചിമേട്, അട്ടത്തോട്, ഇലവുങ്കല്‍, നെല്ലിമല, അയ്യന്‍മല തുടങ്ങിയ സ്ഥലങ്ങളിലും പൊലീസ് റിപ്പോര്‍ട്ടിന്റെ അടിസ്ഥാനത്തില്‍ സുരക്ഷാ ക്രമീകരണങ്ങള്‍ ഒരുക്കും. ഇടുക്കി ജില്ലയിലെ പുല്ലുമേട്, പാഞ്ചാലിമേട്, പരുന്തുംപാറ എന്നിവിടങ്ങളിലും മകരജ്യോതി ദര്‍ശന സൗകര്യം ഒരുക്കുന്നതിന്റെ സാധ്യത പരിശോധിക്കും. സര്‍ക്കാരാണ് ഇക്കാര്യത്തില്‍ അന്തിമ തീരുമാനം എടുക്കേണ്ടത്. ഓരോ കേന്ദ്രങ്ങളിലും ആവശ്യമായ വൈദ്യുതി, കുടിവെള്ളം എന്നിവ ഒരുക്കും. ആരോഗ്യ വകുപ്പ് ഉള്‍പ്പെടെയുള്ള എല്ലാവരും ഏത് അടിയന്തര സാഹചര്യവും നേരിടാന്‍ തയാറെടുപ്പുകള്‍ നടത്തണമെന്ന് എഡിഎം അര്‍ജുന്‍ പാണ്ഡ്യന്‍ നിര്‍ദേശം നല്‍കി. ആവശ്യമായ ജീവനക്കാരെയും ഇതിനായി നിയോഗിക്കണം. കൂടുതല്‍ സ്ഥലങ്ങളില്‍ ദര്‍ശന സൗകര്യം ഒരുക്കുന്നതിലൂടെ തിരക്കു നിയന്ത്രിക്കാനും കോവിഡ് മാനദണ്ഡങ്ങള്‍ പാലിക്കുന്നുണ്ടെന്ന് ഉറപ്പാക്കാനും സാധിക്കുമെന്നും അദ്ദേഹം പറഞ്ഞു. ശബരിമല സന്നിധാനത്തു കൂടുതല്‍ വിരി സ്ഥലങ്ങള്‍ ഒരുക്കി. അതിനാല്‍ തീര്‍ഥാടകരെ പകല്‍ സമയങ്ങളിലും വിരിവയ്ക്കാന്‍ അനുവദിക്കും. നേരത്തേ രാത്രി മാത്രമായിരുന്നു അനുമതി.