മദര്‍ തെരേസയെ അധിക്ഷേപിച്ച് ആര്‍.എസ്.എസ് വാരിക പാഞ്ചജന്യ; വിശുദ്ധയാക്കിയത്

ന്യൂഡല്‍ഹി: മദര്‍ തെരേസക്കും അവര്‍ സ്ഥാപിച്ച സന്യാസിനീസഭയായ മിഷനറീസ് ഓഫ് ചാരിറ്റിക്കുമെതിരെ അധിക്ഷേപം ചൊരിഞ്ഞ് ആര്‍.എസ്.എസിന്റെ വാരികയായ പാഞ്ചജന്യ. മദര്‍ തെരേസയെ വിശുദ്ധയായി പ്രഖ്യാപിച്ചത് നുണയുടെ അടിസ്ഥാനത്തിലാണെന്ന് അവകാശപ്പെടുന്ന പാഞ്ചജന്യയിലെ ലേഖനം, മതപരിവര്‍ത്തനം സംബന്ധിച്ചും മറ്റ് ക്രമക്കേടുകള്‍ സംബന്ധിച്ചും മിഷനറീസ് ഓഫ് ചാരിറ്റിക്കെതിരെ ഉയര്‍ന്ന ആരോപണങ്ങള്‍ പുതിയതല്ലെന്നും പറയുന്നു. 'കുരിശേറ്റം, അധികാരം, ഗൂഢാലോചന' എന്ന തലക്കെട്ടില്‍ പ്രസിദ്ധീകരിച്ച ലേഖനത്തില്‍, മദര്‍ തെരേസക്ക് ഭാരതരത്‌ന പുരസ്‌കാരം നല്‍കിയത് ഇന്ത്യയില്‍ മതനിരപേക്ഷ രാഷ്ട്രീയം എന്ന് വിളിക്കപ്പെടുന്നതിന്റെ ആവശ്യകത മുന്‍നിര്‍ത്തിയാണെന്ന് അവകാശപ്പെടുന്നു. നുണയുടെ അടിസ്ഥാനത്തിലാണ് മദര്‍ തെരേസയെ വിശുദ്ധയാക്കിയത്. സേവനത്തിന്റെ പേരില്‍ മതപരിവര്‍ത്തനം നടത്തുന്നു എന്ന ആരോപണം മിഷണറീസ് ഓഫ് ചാരിറ്റിക്കെതിരെ പലപ്പോഴും ഉയര്‍ന്നിട്ടുണ്ട്. മിഷണറീസ് ഓഫ് ചാരിറ്റി കേന്ദ്രങ്ങളില്‍ അസുഖബാധിതര്‍ക്ക് മരുന്ന് നല്‍കാതെ ക്രൂശിത സമയത്ത് യേശുക്രിസ്തു അനുഭവിച്ച വേദന അനുഭവിപ്പിക്കുകയാണ്. എന്നാല്‍, 1991ല്‍ മദര്‍ തെരേസ അസുഖബാധിതയായപ്പോള്‍ കലിഫോര്‍ണിയയിലെ ആശുപത്രിയിലാണ് ചികിത്സിച്ചത്. മിഷണറീസ് ഓഫ് ചാരിറ്റിയില്‍ അസുഖബാധിതനായ ഒരു കുട്ടിക്ക് മരുന്ന് നല്‍കുന്നതില്‍ നിന്നും വിലക്കിയതിനാല്‍ കന്യാസ്ത്രീ രാജിവെച്ച സംഭവമുണ്ടായിട്ടുണ്ട് -ലേഖനം പറയുന്നു. മാധ്യമങ്ങളെ ഉപയോഗിച്ചാണ് മദര്‍ തെരേസയെ മാതൃത്വത്തിന്റെ പ്രതിരൂപമായി സൃഷ്ടിച്ചെടുത്തത്. മതനിരപേക്ഷ രാഷ്ട്രീയം എന്ന് വിളിക്കപ്പെടുന്ന ഒന്ന് നിലനില്‍ക്കേണ്ടത് ആവശ്യമായതിനാലാണ് മദര്‍ തെരേസക്ക് ഭാരതരത്‌ന നല്‍കിയത്. ഈയൊരു പ്രഭാവം പതുക്കെ മദര്‍ തെരേസയെ ചോദ്യംചെയ്യരുതാത്ത വ്യക്തിത്വമായി മാറ്റി. നുണയുടെ അടിസ്ഥാനത്തിലാണ് മദര്‍ തെരേസയെ വിശുദ്ധയായി പ്രഖ്യാപിച്ചത്. മദര്‍ തെരേസ അര്‍ബുദം മാറ്റിയെന്ന് അവകാശപ്പെട്ട സ്ത്രീക്ക് ഒരിക്കലും അര്‍ബുദമുണ്ടായിരുന്നില്ല. കുടുംബാസൂത്രണത്തിന് മദര്‍ തെരേസ എതിരായിരുന്നു. അവര്‍ സേവിക്കുന്ന ജനങ്ങളുടെ സാംസ്‌കാരിക ചരിത്രത്തെ കുറിച്ച് ഒരിക്കലും സംസാരിച്ചിട്ടില്ല -ലേഖനത്തില്‍ പറയുന്നു. ലേഖനത്തിലെ ആരോപണങ്ങളെ കുറിച്ച് മിഷണറീസ് ഓഫ് ചാരിറ്റി പ്രതികരിച്ചിട്ടില്ല. മിഷണറീസ് ഓഫ് ചാരിറ്റിക്ക് വിദേശസഹായം സ്വീകരിക്കാനുള്ള അനുമതി അടുത്തിടെ കേന്ദ്ര സര്‍ക്കാര്‍ നിഷേധിച്ചിരുന്നു. 'ഹാനികരമായ വിവരങ്ങള്‍' ഉണ്ടെന്നു ചൂണ്ടിക്കാട്ടിയാണ് അനുമതി പുതുക്കാനായി സമര്‍പ്പിച്ച അപേക്ഷ ആഭ്യന്തര മന്ത്രാലയം തള്ളിയത്. ഇത് ഏറെ വിവാദമായിരുന്നു. മതംമാറ്റശ്രമം ആരോപിച്ച് ഗുജറാത്തില്‍ മിഷണറീസ് ഓഫ് ചാരിറ്റിക്കെതിരെ കേസെടുത്ത സംഭവവുമുണ്ടായിരുന്നു. തീവ്ര ഹിന്ദുത്വശക്തികള്‍ രാജ്യവ്യാപകമായി ക്രൈസ്തവര്‍ക്കെതിരെ ആക്രമണങ്ങള്‍ നടത്തുന്ന സാഹചര്യത്തില്‍ കൂടിയാണ് മിഷണറീസ് ഓഫ് ചാരിറ്റിയെയും മദര്‍ തെരേസയെയും അധിക്ഷേപിച്ച് ആര്‍.എസ്.എസ് വാരിക രംഗത്തെത്തിയത്.