പന്തീരാങ്കാവ് കൊടല്‍ നടക്കാവില്‍ കാര്‍ ലോറിയുടെ അടിയില്‍പ്പെട്ടു. ഒരു കുടുംബത്തിലെ രണ്ടു പേര്‍ മരിച്ചു

പന്തീരാങ്കാവ്: പന്തീരാങ്കാവ് ബൈപ്പാസില്‍ കൊടല്‍ നടക്കാവിന് സമീപം ലോറി കാറിലും ഓട്ടോയിലുമിടിച്ച് രണ്ട് പേര്‍ മറിച്ചു. വ്യാഴാഴ്ച വൈകുന്നേരം 5 മണിയോടെയാണ് സംഭവം. കോഴിക്കോട് ഭാഗത്ത് നിന്ന് വരുന്ന ലോറിയാണ് എതിരെ വരുന്ന കാറിലും ഗുഡ്സ് ഓട്ടോയിലും ഇടിച്ച് അപകടം വരുത്തിയത്. കാറിലുണ്ടായിരുന്ന കോഴിക്കോട് മടവൂര്‍ ചക്കാലക്കല്‍ എതിരന്‍മല കൃഷണന്‍കുട്ടി (54)ഭാര്യ സുധ (45) എന്നിവരാണ് മരിച്ചത്. ഇവരുടെ മകന്‍ അരുണ്‍ (21), ഗുഡ്സ് ഓട്ടോയിലുണ്ടായിരുന്ന ചേളാരി സ്വദേശികളായ അന്‍വര്‍ ( 44 ) സമീറ(38) എന്നിവര്‍ ഗുരുതര നിലയില്‍ കോഴിക്കോട് മെഡിക്കല്‍ കോളേജില്‍ ചികിത്സയിലാണ്. അപകടം വരുത്തിയ ലോറി അമിത വേഗതയില്‍ ദിശമാറി വന്നതാണ് അപകടത്തിനിടയാക്കിയതെന്ന് നാട്ടുകാര്‍ പറഞ്ഞു. ലോറിയുടെ അടിയില്‍ അകപ്പെട്ട കാറിനെയും വലിച്ചിഴച്ചാണ് പിറകിലെ ഓട്ടോയിലും ഇടിച്ചത്. പന്തീരാങ്കാവ്, നല്ലളം പൊലീസും മീഞ്ചന്ത സ്റ്റേഷനില്‍ നിന്ന് ഫയര്‍ഫോഴ്സും നാട്ടുകാരും ചേര്‍ന്നാണ് പരിക്കേറ്റവരെ പുറത്തെടുത്തത്. ഇടിയുടെ ആഘാതത്തില്‍ കാറ് പൂര്‍ണ്ണമായും തകര്‍ന്നിട്ടുണ്ട്. മകന്‍ അഭിജിത്തിനെ എറണാംകുളത്ത് പഠന സ്ഥലത്ത് എത്തിച്ച് തിരിച്ച് വരുമ്പോഴാണ് കൃഷ്ണന്‍ കുട്ടിയും കുടുംബവും അപകടത്തില്‍ പെട്ടത്. ഇവരുടെ സുഹൃത്താണ് കാറ് ഓടിച്ചിരുന്നത്. ക്രെയിന്‍ ഉപയോഗിച്ച് ലോറി മാറ്റിയാണ് കാറിലും ഓട്ടോയിലുമുള്ളവരെ പുറത്തെടുത്തത്. അപകടത്തിനു കാരണമായ ലോറി ഡ്രൈവര്‍ സംഭവ സ്ഥലത്ത് നിന്നും രക്ഷപ്പെട്ടു.രാമനാട്ടുകര തൊണ്ടയാട് ബൈപ്പാസ് ഏറെ നേരം ഗതാഗതം തടസപ്പെട്ടു.