ബിന്ദു അമ്മിണിയെ ആക്രമിച്ചയാള്‍ അറസ്റ്റില്‍

ദലിത് ആക്ടിവിസ്റ്റ് ബിന്ദു അമ്മിണിയെ കോഴിക്കോട് ബീച്ചില്‍വച്ച് ആക്രമിച്ചയാള്‍ അറസ്റ്റില്‍. പ്രതി വെള്ളയില്‍ സ്വദേശി മോഹന്‍ദാസിനെ വെള്ളയില്‍ പൊലീസാണ് അറസ്റ്റു ചെയ്തത്. കീഴടങ്ങാനായി പ്രതി വീട്ടില്‍നിന്നിറങ്ങുന്നതിനിടെ പൊലീസ് വീട്ടിലെത്തി കസ്റ്റഡിയിലെടുത്ത് അറസ്റ്റു ചെയ്യുകയായിരുന്നു. കഴിഞ്ഞ ദിവസം വൈകിട്ട് 5.30നാണ് സംഭവമുണ്ടായത്. ഒരു പ്രകോപനവുമില്ലാതെ പ്രതി ആക്രമിക്കുകയായിരുന്നുവെന്നു ബിന്ദു അമ്മിണി ആരോപിച്ചിരുന്നു. ആക്രമിക്കുന്നതിന്റെ വിഡിയോയും സമൂഹമാധ്യമത്തില്‍ പങ്കുവച്ചിരുന്നു. അക്രമങ്ങള്‍ക്കെതിരെ ഇനി തിരിച്ചടിക്കാനാണു തീരുമാനമെന്നു ബിന്ദു പറയുന്നതും ഇയാളുടെ ഫോണ്‍ എറിഞ്ഞു തകര്‍ക്കുന്നതും ദൃശ്യങ്ങളിലുണ്ട്. ഒരു മാസം മുന്‍പ് കൊയിലാണ്ടിയില്‍ രാത്രി വീട്ടിലേക്കു പോകുന്നതിനിടെ ഓട്ടോ ഇടിച്ച് ബിന്ദു അമ്മിണിക്കു പരുക്കേറ്റിരുന്നു. ഇടിച്ചിട്ടു നിര്‍ത്താതെപോയ ഓട്ടോഡ്രൈവറെ കണ്ടെത്താന്‍ ഇതുവരെ പൊലീസിനു കഴിഞ്ഞിട്ടില്ല. ശബരിമല പ്രവേശനത്തിനു ശേഷം പല തവണ ബിന്ദുവിനെതിരെ ആക്രമണങ്ങള്‍ ഉണ്ടായിട്ടുണ്ട്