സിറോ മലബാര്‍ സഭാ സിനഡിന് ഇന്ന് തുടക്കം

സിറോ മലബാര്‍ സഭാ സിനഡിന് ഇന്ന് തുടക്കം. കുര്‍ബാന എകീകരണത്തിന് ശേഷമുള്ള ആദ്യ സിനഡ് ആണ് ഇന്ന് ചേരുന്നത്. സിനഡ് തീരുമാനത്തിനെതിരെ പരസ്യ നിലപാടെടുത്ത എറണാകുളം അങ്കമാലി അതിരൂപത ആര്‍ച്ച് ബിഷപ്പ് ആന്റണി കരിയലിനെതിരെ നടപടികള്‍ക്കുള്ള സാധ്യത സജീവമാണ്. തീരുമാനങ്ങളുമായി സിനഡ് മുന്നോട്ട് പോകുകയാണെങ്കില്‍ വരും നാളുകളില്‍ സഭയില്‍ പ്രതിസന്ധിയും രൂക്ഷമാകും. ഇന്നു മുതല്‍ ജനുവരി 15 വരെ സിറോ മലബാര്‍ സഭയുടെ ആസ്ഥാനമായ കാക്കനാട്ടെ മൗണ്ട് സെന്റ് തോമസിലാണ് സമ്പൂര്‍ണ്ണ സിനഡ് നടക്കുന്നത്. കഴിഞ്ഞ രണ്ടു വര്‍ഷവും കൊവിഡ് കാരണം ഓണ്‍ലൈനായാണ് സിനഡ് ചേര്‍ന്നത്. കുര്‍ബാന ഏകീകരണത്തില്‍ കഴിഞ്ഞ സിനഡിലും ഒത്തൊരുമ ഇല്ലായിരുന്നുവെന്നും 12 ബിഷപ്പുമാരുടെ വിയോജിപ്പ് വത്തിക്കാനെ അറിയിച്ചില്ല എന്നും സിനഡില്‍ പങ്കെടുത്ത് ആറ് ബിഷപ്പുമാര്‍ വത്തിക്കാന് കത്തെഴുതിയിരുന്നു. ഇതെല്ലാം സിനഡില്‍ ചര്‍ച്ചയാകും.