ധീരജിന്റെ മരണകാരണം ഹൃദയത്തിലേറ്റ മുറിവ്; ഹൃദയത്തിന്റെ അറകള്‍ തകര്‍ന്നു

ഇടുക്കി ഗവണ്‍മെന്റ് എന്‍ജിനീയറിങ് കോളജിലെ എസ്എഫ്‌ഐ പ്രവര്‍ത്തകന്‍ ധീരജ് രാജേന്ദ്രന്റെ മരണകാരണം ഹൃദയത്തിലേറ്റ ആഴത്തിലുള്ള മുറിവെന്ന് പോസ്റ്റ്‌മോര്‍ട്ടം റിപ്പോര്‍ട്ട്. കുത്തേറ്റ് ഹൃദയത്തിന്റെ അറകള്‍ തകര്‍ന്നുവെന്നും പോസ്റ്റ്‌മോര്‍ട്ടം റിപ്പോര്‍ട്ടില്‍ പറയുന്നു. ശരീരത്തില്‍ മര്‍ദനമേറ്റതിന്റെ നിരവധി പാടുകളുണ്ട്. തലയിലും പരുക്കേറ്റിട്ടുണ്ട്. അതേസമയം, കേസില്‍ അറസ്റ്റിലായവര്‍ വിദ്യാര്‍ഥികളല്ലെന്ന് ഇടുക്കി എസ്പി ആര്‍.കറുപ്പസ്വാമി അറിയിച്ചു. കൂടുതല്‍ പേര്‍ കസ്റ്റഡിയിലുണ്ടെന്നും കൂടുതല്‍ പേരെ നിരീക്ഷിക്കുന്നതായും എസ്പി പറഞ്ഞു. കേസില്‍ ഇതുവരെ മൂന്നുപേരാണ് അറസ്റ്റിലായത്. നിഖില്‍ പൈലി, ജെറിന്‍ ജോജോ, അലക്‌സ് റാഫേല്‍ എന്നിവരാണ് അറസ്റ്റിലായത്. ഇന്നലെ ഉച്ചയ്ക്കാണ് ഇടുക്കി ഗവണ്‍മെന്റ് എന്‍ജിനീയറിങ് കോളജിലെ ബിടെക് കംപ്യൂട്ടര്‍ സയന്‍സ് ഏഴാം സെമസ്റ്റര്‍ വിദ്യാര്‍ഥി കണ്ണൂര്‍ തളിപ്പറമ്പ് സ്വദേശി ധീരജ് രാജേന്ദ്രന്‍ (21) കുത്തേറ്റു മരിച്ചത്. ആക്രമണത്തില്‍ തൃശൂര്‍ സ്വദേശി അഭിജിത് ടി.സുനില്‍ (21), കൊല്ലം സ്വദേശി എ.എസ്.അമല്‍ (23) എന്നിവര്‍ക്കു പരുക്കേറ്റിരുന്നു. ഇരുവരും ഇടുക്കി മെഡിക്കല്‍ കോളജില്‍ ചികിത്സയിലാണ്.