പൊലീസ് പ്രവര്‍ത്തനം കുറ്റ വിമുക്തമാക്കാനാണ് സര്‍ക്കാരിന്റെ ശ്രമം; മുഖ്യമന്ത്രി

പൊലീസ് പ്രവര്‍ത്തനം കുറ്റവിമുക്തമാക്കാനാണ് സര്‍ക്കാര്‍ ശ്രമമെന്ന് മുഖ്യമന്ത്രി പിണറായി വിജയന്‍. പൊലീസ് നയം ജനപക്ഷത്ത് നിന്നാകണം എന്നതാണ് സര്‍ക്കാര്‍ നിലപാട്. നീതി ഉറപ്പാക്കുന്ന നടപടി മാത്രമാണ് സര്‍ക്കാരിന്റെ ലക്ഷ്യമെന്ന് മുഖ്യമന്ത്രി പറഞ്ഞു. പൊലീസിനെതിരെ പരാതികള്‍ ഉയരുമ്പോള്‍ പരിശോധിക്കുമെന്നും ശക്തമായ നടപടി സ്വീകരിക്കുമെന്നും മുഖ്യമന്ത്രി പറഞ്ഞു. സിപിഎം കോഴിക്കോട് ജില്ലാ സമ്മേളനത്തിലെ പൊതു ചര്‍ച്ചയ്ക്ക് മറുപടി നല്‍കുകയായിരുന്നു അദ്ദേഹം. സിപിഎമ്മിന്റെ കോഴിക്കോട് ജില്ലാ സമ്മേളനത്തില്‍ പൊലീസിനെതിരെ അതിരൂക്ഷ വിമര്‍ശനമാണ് ഉയര്‍ന്നത്. അലന്‍ താഹ, ശുഹൈബ് എന്‍ഐഎ കേസിലും കെ റെയില്‍ പദ്ധതിയിലും സര്‍ക്കാരിനും പൊലീസ് വകുപ്പിനും എതിരെ രൂക്ഷവിമര്‍ശനമാണ് പ്രതിനിധികളില്‍ നിന്നുണ്ടായത്. മുഖ്യമന്ത്രിയുടേയും കോടിയേരി ബാലകൃഷ്ണന്റെയും സാന്നിധ്യത്തിലാണ് വിവിധ വിഷയങ്ങളില്‍ പ്രതിനിധികളില്‍ നിന്നും വിമര്‍ശനം ഉണ്ടായത്. സഖാക്കള്‍ ഉന്നയിക്കുന്ന ന്യായമായ വിഷയങ്ങളില്‍ പോലും പൊലീസ് അനീതിയാണ് കാണിക്കുന്നതെന്നും പാര്‍ട്ടി പ്രവര്‍ത്തകരെ ചെയ്യാത്ത കുറ്റത്തിന് പ്രതി ചേര്‍ക്കുന്ന സാഹചര്യമുണ്ടെന്നും വിമര്‍ശനം ഉണ്ടായി.