ആദിവാസി പെണ്‍കുട്ടികളുടെ ദുരൂഹമരണങ്ങള്‍: ഉന്നത പൊലീസ് ഉദ്യോഗസ്ഥര്‍ ഊരുകളിലെത്തും, കൗണ്‍സിലിംഗ് വേണമെന്ന് ആവശ്യം

വിതുര ആദിവാസി ഊരുകളിലെ പെണ്‍കുട്ടികളുടെ ദുരൂഹമരണത്തെക്കുറിച്ചുള്ള അന്വേഷണത്തോടൊപ്പം മേഖലയില്‍ കൗണ്‍സിലിംഗും വേണമെന്ന് ആവശ്യം. ഊരുകളിലെ പെണ്‍കുട്ടികള്‍ക്കും രക്ഷിതാക്കള്‍ക്കും നിരന്തരമായി കൗണ്‍സിലിംഗ് വേണമെന്നാണ് ഊരുമൂപ്പന്‍ അടക്കമുള്ളവരുടെ ആവശ്യപ്പെടുന്നത്. പെരിങ്ങമല,വിതുര പഞ്ചായത്തുകളിലെ ആദിവാസി ഊരുകളില്‍ അഞ്ചുമാസത്തിനിടെ ജീവനൊടുക്കിയത് അഞ്ച് പെണ്‍കുട്ടികളാണ്. ഊരുകളില്‍ കൃഷിപ്പണിയാണ് ഉപജീവനമാര്‍ഗം. രാവിലെ ജീവിതമാര്‍ഗം തേടി രക്ഷിതാക്കളിറങ്ങും. ഓണ്‍ലൈന്‍ ക്ലാസയതോടെ എല്ലാ കുട്ടികളുടെ കൈകളിലും മൊബൈല്‍ എത്തി. ഈ മൊബൈല്‍ വഴി പരിചയം സ്ഥാപിക്കുന്ന യുവാക്കള്‍ പിന്മാറുന്നതാണ് പെണ്‍കുട്ടികളെ തകര്‍ക്കുന്നത്. പലരും ചൂഷണത്തിനും ഇരയാകുന്നു. ഒരു ചെറിയ കാലത്തെ പരിചയം മാത്രമാണ് ഇവര്‍ തമ്മിലുണ്ടാകുന്നത്. പക്ഷേ ഈ ബന്ധങ്ങള്‍ തകരുന്നത് ഇവര്‍ക്ക് താങ്ങാന്‍ കഴിയുന്നില്ല. മാത്രമല്ല പെണ്‍കുട്ടികളെ ചതിക്കുഴിലേക്ക് തള്ളിയിടുന്നവര്‍ കഞ്ചാവ് സംഘങ്ങളാണെന്ന് ഊരിലുള്ളവര്‍ തന്നെ പറയുന്നു. മരിച്ചതെല്ലാം നന്നായി പഠിക്കുന്ന കുട്ടികളാണ്. പ്രശ്‌നങ്ങളില്‍ പട്ടികവര്‍ഗ വകുപ്പോ പൊലീസോ എക്‌സൈസോ സജീവമായി ഇടപെടാത്തതും അച്ഛനമ്മമാര്‍ക്ക് കുട്ടികളെ നഷ്ടമാകുന്നതിന് ഇടയാക്കുന്നുണ്ട്. ഏഷ്യാനെറ്റ് ന്യൂസ് വാര്‍ത്തക്ക് പിന്നാലെ വനിത-ശിശുക്ഷേമ വകുപ്പും പൊലീസും എക്‌സൈസും എസ്ടി വകുപ്പും അന്വേഷണം തുടങ്ങിയിട്ടുണ്ട്. പെണ്‍കുട്ടികള്‍ക്കും രക്ഷിതാക്കള്‍ക്കും വേണ്ടി കൗണ്‍ലിംഗ് ഉള്‍പ്പെടെ ഒരു സമഗ്ര പാക്കേജ് തന്നെ പൊലീസ് നടപ്പാക്കും. തിങ്കളാഴ്ച്ച റൂറല്‍ എസ്പി ഡോ.ദിവ്യ ഗോപിനാഥ് ഊകുകളില്‍ നേരിട്ട് സന്ദര്‍ശനം നടത്തും.