‘സ്‌കൂളില്‍ പഠിപ്പിച്ചിട്ടുണ്ട്, ഇത് ബാഡ് ടച്ച്’; കുട്ടി കോടതിയില്‍ പറഞ്ഞു; പ്രതിക്ക് 5 വര്‍ഷം തടവ്

ഒന്‍പതു വയസ്സുകാരനെ പീഡിപ്പിച്ച കേസില്‍ പ്രതിക്ക് അഞ്ചു വര്‍ഷം തടവും 25,000 രൂപ പിഴയും. മണക്കാട് കാലടി സ്വദേശി വിജയകുമാറിനെയാണ് (54) കോടതി ശിക്ഷിച്ചത്. പോക്‌സോ വകുപ്പ് പ്രകാരം റജിസ്റ്റര്‍ ചെയ്ത കേസില്‍ പ്രതി യാതൊരു ദയയും അര്‍ഹിക്കുന്നില്ലെന്നു ചൂണ്ടികാട്ടിയായിരുന്നു തിരുവനന്തപുരം അതിവേഗ കോടതിയുടെ വിധി. പിഴ തുകയായ 25,000 രൂപ അടച്ചില്ലെങ്കില്‍ ആറു മാസം കൂടി തടവ് അനുഭവിക്കണം. 2020 നവംബര്‍ 26ന് തുമ്പ സ്വദേശിയായ ഒന്‍പതു വയസ്സുകാരന്‍ വീടിനു മുന്നില്‍ നില്‍ക്കുമ്പോഴായിരുന്നു വിജയകുമാര്‍ പീഡിപ്പിച്ചത്. വീട്ടില്‍ ജോലിക്കായി എത്തിയ ഇയാള്‍ കുട്ടിയെ ബലം പ്രയോഗിച്ച് വീടിനു സമീപത്തേക്ക് കൊണ്ടുപോയ ശേഷം കുട്ടിയുടെ സ്വകാര്യ ഭാഗത്ത് ദുരുദ്ദേശത്തോടെ സ്പര്‍ശിച്ചുവെന്നാണ് കേസ്. രക്ഷിതാക്കളാണ് വിവരം പൊലീസില്‍ അറിയിച്ചത്. കോടതിയോട് അന്നു നടന്ന സംഭവം കുട്ടി അതുപോലെ വിവരിച്ചു. ഗുഡ് ടച്ചും ബാഡ് ടച്ചും എന്താണെന്നുള്ള അറിവ് സ്‌കൂളില്‍നിന്ന് ലഭിച്ചിട്ടുണ്ടെന്നും പ്രതിയുടെ ഭാഗത്തുനിന്നുണ്ടായത് ബാഡ് ടച്ച് ആയിരുന്നുവെന്നും കുട്ടി കോടതിയില്‍ പറഞ്ഞു. ഇതിന്റെ കൂടി അടിസ്ഥാനത്തിലായിരുന്നു കോടതി ഉത്തരവ്. കുട്ടിയ്ക്ക് സര്‍ക്കാര്‍ നഷ്ടപരിഹാരം നല്‍കണമെന്നും, പ്രതി പിഴ തുക നല്‍കുകയാണെങ്കില്‍ കുട്ടിയ്ക്ക് നല്‍കണമെന്നും ഉത്തരവില്‍ പറയുന്നുണ്ട്. പ്രോസിക്യൂഷന് വേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ ആര്‍.എസ്.വിജയമോഹന്‍ ഹാജരായി.