ഇന്നലെ കോവിഡ് സ്ഥിരീകരിച്ച നഴ്‌സിങ് ഓഫിസര്‍ മരിച്ചു

വര്‍ക്കല താലൂക്ക് ആശുപത്രിയിലെ നഴ്‌സിങ് ഓഫിസര്‍ കോവിഡ് ബാധിച്ച് മരിച്ചു. വര്‍ക്കല പുത്തന്‍ ചന്ത സ്വദേശിനി പി.എസ്.സരിത (46) ആണ് മരിച്ചത്. കല്ലറ സിഎഫ്എല്‍ടിസിയില്‍ ഡ്യൂട്ടിയിലായിരുന്ന സരിത, ഡ്യൂട്ടി കഴിഞ്ഞ് ഇന്നലെയാണ് വീട്ടില്‍ മടങ്ങിയെത്തിയത്. അസ്വസ്ഥത തോന്നിയതിനെ തുടര്‍ന്ന് നടത്തിയ പരിശോധനയിലാണ് കോവിഡ് സ്ഥിരീകരിച്ചത്. തുടര്‍ന്ന് വീട്ടില്‍ ക്വാറന്റീനിലായിരുന്ന സരിതയെ ഇന്ന് പുലര്‍ച്ചെ അവശനിലയില്‍ കണ്ടെത്തുകയായിരുന്നു. ഉടന്‍ തന്നെ സമീപത്തെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും രക്ഷിക്കാനായില്ല. സരിതയ്ക്ക് നേരത്തെ തൈറോയ്ഡ് ശസ്ത്രക്രിയ നടത്തിയിരുന്നു. സരിതയുടെ മരണത്തില്‍ ആരോഗ്യമന്ത്രി വീണാ ജോര്‍ജ് അനുശോചനം രേഖപ്പെടുത്തി.