ദിലീപിന്റെ ഹര്‍ജി; മാധ്യമങ്ങള്‍ മാര്‍ഗനിര്‍ദേശങ്ങള്‍ ലംഘിച്ചോയെന്നു പരിശോധിക്കാന്‍ നിര്‍ദേശം

നടിയെ ആക്രമിച്ച കേസില്‍ സെഷന്‍സ് കോടതി പുറപ്പെടുവിച്ച രഹസ്യ വിചാരണ മാര്‍ഗനിര്‍ദേശങ്ങള്‍ മാധ്യമങ്ങള്‍ ലംഘിച്ചോ എന്നു പരിശോധിക്കാന്‍ സംസ്ഥാന പൊലീസ് മേധാവിയോടു ഹൈക്കോടതി. നടിയെ ആക്രമിച്ച കേസിന്റെ വാര്‍ത്തകള്‍ പ്രസിദ്ധീകരിക്കുന്നതിനെതിരെ നടന്‍ ദിലീപ് സമര്‍പ്പിച്ച ഹര്‍ജിയിലാണ് ഹൈക്കോടതി ഇടപെടല്‍. നിര്‍ദേശങ്ങള്‍ ലംഘിച്ചതായി കണ്ടെത്തിയാല്‍ ഉചിതമായ നടപടി സ്വീകരിക്കാനും ആവശ്യപ്പെട്ടിട്ടുണ്ട്. ഹര്‍ജി രണ്ടാഴ്ചയ്ക്കു ശേഷം വീണ്ടും പരിഗണിക്കുന്നതിനു മാറ്റിവച്ചു. സുപ്രീം കോടതി, ഹൈക്കോടതി വിധികള്‍ക്ക് എതിരാണ് ഇപ്പോള്‍ നടക്കുന്ന മാധ്യമ വിചാരണയെന്നായിരുന്നു ദിലീപിന്റെ വാദം.. നടി ആക്രമിക്കപ്പെട്ടെന്ന കേസിന്റെ വാര്‍ത്തകള്‍ പ്രസിദ്ധീകരിക്കുന്നത് സെഷന്‍സ് കോടതി ഉത്തരവിന്റെ ലംഘനമായതിനാല്‍ ഇതു കര്‍ശനമായി വിലക്കണം. മാധ്യമ വിചാരണ നടത്തി ജനവികാരം തനിക്കെതിരാക്കാനാണു ശ്രമം. കേസ് വിചാരണ അട്ടിമറിക്കാനും ശ്രമിക്കുകയാണ്. വിചാരണ നടപടികള്‍ പൂര്‍ത്തിയാകും വരെ വാര്‍ത്തകള്‍ പ്രസിദ്ധീകരിക്കുന്നതു തടയണമെന്നും ദിലീപ് ഹര്‍ജിയില്‍ ആവശ്യപ്പെട്ടു. അതേസമയം ഈ ആവശ്യം പരിഗണിക്കേണ്ടതു വിചാരണക്കോടതിയാണെന്നായിരുന്നു സര്‍ക്കാര്‍ വാദം. അവിടെ പ്രോസിക്യൂഷന്‍ പോലും ഇല്ല എന്നായിരുന്നു ദിലീപിന്റെ അഭിഭാഷന്റെ മറുപടി.