ഇന്‍സ്റ്റഗ്രാം സുഹൃത്തിനൊപ്പം വീടുവിട്ട പെണ്‍കുട്ടിയെ കണ്ടെത്തി; 19കാരന്‍ റിമാന്‍ഡില്‍

ഈരാറ്റുപേട്ട മേലമ്പാറയില്‍നിന്നു കാണാതായ വിദ്യാര്‍ഥിനിയെ തിരുവനന്തപുരം കാട്ടാക്കടയില്‍ കണ്ടെത്തി. ഇന്‍സ്റ്റഗ്രാമിലൂടെ പരിചയപ്പെട്ട തിരുവനന്തപുരം പൂവച്ചല്‍ സ്വദേശി ജെഫിന്‍ നിവാസില്‍ ജെഫിന്‍ ജോയ്ക്ക് (19) ഒപ്പമാണ് വിദ്യാര്‍ഥിനിയെ വ്യാഴാഴ്ച ഉച്ചയോടെ ഈരാറ്റുപേട്ട പൊലീസ് കണ്ടെത്തിയത്. ഇരുവരെയും ഈരാറ്റുപേട്ട കോടതിയില്‍ ഹാജരാക്കി. ജെഫിനെ 14 ദിവസത്തേയ്ക്കു റിമാന്‍ഡ് ചെയ്തു. കോവിഡ് പോസിറ്റീവായതിനാല്‍ ജനറല്‍ ആശുപത്രിയിലേക്കു മാറ്റി. പെണ്‍കുട്ടിയെ രക്ഷിതാക്കള്‍ക്കൊപ്പം വിട്ടയച്ചു. ബുധനാഴ്ച രാവിലെയാണു പെണ്‍കുട്ടിയെ കാണാതായത്. പെണ്‍കുട്ടിയെ മുറിയില്‍ കാണാത്തതിനെ തുടര്‍ന്ന് വീട്ടുകാര്‍ ഈരാറ്റുപേട്ട പൊലീസില്‍ പരാതി നല്‍കുകയായിരുന്നു. മൊബൈല്‍ ഫോണ്‍ എടുക്കാതെയാണ് പെണ്‍കുട്ടി വീടുവിട്ടത്. എന്നാല്‍ സുഹൃത്തിന്റെ ഫോണ്‍ നമ്പര്‍ കേന്ദ്രീകരിച്ചു നടത്തിയ പരിശോധനയില്‍ ഇരുവരും കാട്ടാക്കടയില്‍ ഉണ്ടെന്ന് കണ്ടെത്തുകയായിരുന്നു. ചൊവ്വാഴ്ച വൈകിട്ട് വിദ്യാര്‍ഥിനിയുടെ വീടിനു സമീപമെത്തിയ ജെഫിന്‍ ബുധനാഴ്ച രാവിലെ വിദ്യാര്‍ഥിനിയുമായി കെഎസ്ആര്‍ടിസി ബസില്‍ തിരുവനന്തപുരത്തേക്ക് പോയി. ജെഫിന്റെ സഹോദരിയുടെ വീട്ടിലെത്തിയ ഇവര്‍ പിന്നിട് മറ്റൊരു സുഹൃത്തിന്റെ വീട്ടിലേക്ക് പോകുന്നതിനിടയിലാണ് പൊലീസ് പിടിയിലായത്. പാലാ ഡിവൈഎസ്പി ഷാജു ജോസിന്റെ നേതൃത്വത്തില്‍ ഈരാറ്റുപേട്ട എസ്‌ഐ തോമസ് സേവ്യര്‍, എഎസ്‌ഐമാരായ അനില്‍ കുമാര്‍, ഏലിയാമ്മ ആന്റണി, വനിത പൊലീസ് ഓഫിസര്‍ നിത്യ മോഹന്‍, സിപിഒ ശരത് കൃഷ്ണദേവ് അടങ്ങുന്ന സംഘമാണ് ഇരുവരെയും കണ്ടെത്തിയത്.