ബൈജു പൗലോസിന്റെ ഫോണ്‍രേഖകള്‍ പരിശോധിക്കണമെന്ന് ദിലീപ്

കൊച്ചി: നടിയെ ആക്രമിച്ച കേസില്‍ അന്വേഷണ ഉദ്യോഗസ്ഥരെ അപായപ്പെടുത്താന്‍ ഗൂഢാലോചന നടത്തിയെന്ന കേസിലെ പരാതിക്കാരനും നടിയെ ആക്രമിച്ച കേസിലെ അന്വേഷണ ഉദ്യോഗസ്ഥനുമായ ഡിവൈ.എസ്.പി. ബൈജു പൗലോസിന്റെയും മൊബൈല്‍ ഫോണ്‍ പരിശോധിക്കണമെന്ന് നടന്‍ ദിലീപ് ആവശ്യപ്പെട്ടു. ദിലീപ് അടക്കം നാല് പ്രതികള്‍ പഴയ മൊബൈല്‍ ഫോണ്‍ മാറ്റി തെളിവ് നശിപ്പിക്കാന്‍ ശ്രമിച്ചുവെന്നു കണ്ടെത്തിയ ക്രൈംബ്രാഞ്ച് പഴയ ഫോണ്‍ ഹാജരാക്കാന്‍ നോട്ടീസ് നല്‍കിയിരുന്നു. ഈ നോട്ടീസിനുള്ള മറുപടിക്കത്തിലാണ് ദിലീപ് ഈ ആവശ്യം ഉന്നയിച്ചത്. ക്രൈംബ്രാഞ്ച് ഡിറ്റക്ടീവ് ഇന്‍സ്പെക്ടര്‍ വര്‍ഗീസ് അലക്‌സാണ്ടര്‍ക്കാണ് കത്തുനല്‍കിയത്. ഹാജരാക്കാന്‍ ആവശ്യപ്പെട്ട ഫോണുകള്‍ ഗൂഢാലോചന നടന്നതായി പറയുന്ന 2016-17 കാലത്ത് ഉപയോഗിച്ചവയല്ലെന്നാണ് ദിലീപ് പറയുന്നത്. ആ സമയത്ത് ഉപയോഗിച്ചവ 2017-ല്‍ തന്റെ അറസ്റ്റിനു ശേഷം കോടതിമുമ്പാകെ ഹാജരാക്കി ഫൊറന്‍സിക് പരിശോധനയ്ക്കു വിധേയമാക്കിയവയാണ്.നിലവില്‍ ഹാജരാക്കാന്‍ ആവശ്യപ്പെട്ട ഫോണുകളിലൊന്ന് മറ്റൊരാളുടെ പേരിലുള്ളതാണ്. കുറച്ചു ദിവസങ്ങള്‍ക്കു മുമ്പാണ് ഇതുപയോഗിച്ചു തുടങ്ങിയത്. മറ്റൊന്ന് ബാങ്കിങ് ആവശ്യങ്ങള്‍ക്ക് ഉപയോഗിക്കുന്നതാണ്. സ്ഥിരം ഉപയോഗിക്കുന്ന മൂന്നാമത്തെ ഫോണിലാണ് താനും ബാലചന്ദ്രകുമാറും തമ്മില്‍ സംസാരിച്ചിട്ടുള്ളത്. ഈ ഫോണ്‍ തന്റെ അഭിഭാഷകന്‍ മുഖേന മൊബൈല്‍ ഫൊറന്‍സിക് വിദഗ്ധന്റെ പരിശോധനയ്ക്ക് അയച്ചിരിക്കുകയാണ്. കോടതിയില്‍ ഹാജരാക്കേണ്ട സമയത്ത് എത്തിക്കുമെന്നും കത്തില്‍ പറയുന്നു.ബൈജു പൗലോസും ബാലചന്ദ്രകുമാറും നടത്തിയ ആശയവിനിമയം പരിശോധിക്കണം. സംവിധായകന്‍ വ്യാസന്‍ എടവനക്കാട്, അഡ്വ. സജിത്ത് എന്നിവരുമായി ബാലചന്ദ്രകുമാര്‍ നടത്തിയ ആശയവിനിമയവും പരിശോധിക്കണം. ബാലചന്ദ്രകുമാര്‍ താനുമായി നടത്തിയ ആശയവിനിമയം എന്താണെന്ന് പരിശോധിക്കാനും ദിലീപ് ആവശ്യപ്പെടുന്നുണ്ട്. ഗൂഢാലോചനക്കേസ്: അഭിഭാഷകന്റെ മൊഴിയെടുത്തു കൊച്ചി: നടിയെ ആക്രമിച്ച കേസ് അന്വേഷിച്ച ഉദ്യോഗസ്ഥരെ അപായപ്പെടുത്താന്‍ ഗൂഢാലോചന നടത്തിയെന്ന കേസില്‍ അഭിഭാഷകന്റെ മൊഴിയെടുത്തു. തിരുവനന്തപുരം സ്വദേശി സജിത്തിന്റെ മൊഴിയാണ് രേഖപ്പെടുത്തിയത്. ഇദ്ദേഹം തന്നെ സ്വാധീനിക്കാന്‍ ശ്രമിച്ചെന്ന സംവിധായകന്‍ ബാലചന്ദ്രകുമാറിന്റെ മൊഴിയുടെ അടിസ്ഥാനത്തിലാണ് നടപടി. നടന്‍ ദിലീപിന് ജാമ്യം ലഭിക്കാന്‍ ഇടപെട്ടതായി ബാലചന്ദ്രകുമാര്‍ പറഞ്ഞതായാണ് അഭിഭാഷകന്റെ മൊഴി. ബാലചന്ദ്രകുമാര്‍ അയച്ച വാട്സാപ്പ് ചാറ്റുകള്‍ അഭിഭാഷകന്‍ ക്രൈംബ്രാഞ്ച് സംഘത്തിനു കൈമാറി.