നടിയെ ആക്രമിച്ച കേസില്‍ പള്‍സര്‍ സുനിയെ ജയിലിലെത്തി ചോദ്യം ചെയ്തു; നിര്‍ണായകം

നടിയെ ആക്രമിച്ച കേസില്‍ പ്രതി പള്‍സര്‍ സുനിയെ അന്വേഷണ സംഘം ചോദ്യം ചെയ്തു. സംവിധായകന്‍ ബാലചന്ദ്രകുമാറിന്റെ ആരോപണങ്ങളുടെ പശ്ചാത്തലത്തില്‍ കാക്കനാട് സബ് ജയിലില്‍ വച്ചായിരുന്നു ചോദ്യം ചെയ്യല്‍.നടിയെ ആക്രമിച്ച കേസില്‍ തുടരന്വേഷണം നടക്കുന്നതിനിടയിലാണ് പള്‍സര്‍ സുനിയെ ചോദ്യം ചെയ്തത്. പള്‍സര്‍ സുനി ജയിലില്‍വച്ച് എഴുതി എന്ന തരത്തിലുള്ള കത്ത് പുറത്തുവന്നിരുന്നു. ഇതുമായി ബന്ധപ്പെട്ട് സുനിയുടെ സെല്ലില്‍ പരിശോധന നടത്തി. ഇതിനു പിന്നാലെയാണ് നിര്‍ണായക നീക്കം. ഇയാളില്‍നിന്നു ലഭിക്കുന്ന വിവരങ്ങള്‍ കൂടി പൊലീസ് കോടതിയില്‍ സമര്‍പ്പിക്കും. അതേസമയം, വധഗൂഢാലോചന കേസില്‍ നടന്‍ ദിലീപിന്റെ മൊബൈല്‍ ഫോണുകള്‍ ഹൈക്കോടതിക്കു കൈമാറാന്‍ തയാറാണോയെന്ന് സിംഗിള്‍ ബെഞ്ച് ചോദിച്ചു. എന്നാല്‍ സ്വകാര്യതയുടെ ലംഘനവും തെറ്റായ കീഴ്വഴക്കവുമായിരിക്കുമെന്ന് ചൂണ്ടിക്കാട്ടി ദിലീപ് ഈ നിര്‍ദേശം നിരസിച്ചു.ദിലീപിന്റെയും കൂട്ടുപ്രതികളുടെയും മൊബൈല്‍ ഫോണുകള്‍ കൈമാറാന്‍ നിര്‍ദേശിക്കണമെന്ന് ആവശ്യപ്പെട്ട് പ്രോസിക്യൂഷന്‍ നല്‍കിയ ഉപഹര്‍ജിയിലായിരുന്നു ഹൈക്കോടതി നിര്‍ദേശം. ഹര്‍ജിയില്‍ ശനിയാഴ്ച വിശദമായി വാദം കേള്‍ക്കും.