ഭാര്യ കാമുകനൊപ്പം ഒളിച്ചോടി; കാഞ്ഞങ്ങാട് യുവാവ് ആത്മഹത്യ ചെയ്തു

കാഞ്ഞങ്ങാട്: ഭാര്യ കാമുകനൊപ്പം ഒളിച്ചോടിയതില്‍ മനംനൊന്ത് യുവാവ് ആത്മഹത്യ ചെയ്തു. കാഞ്ഞങ്ങാട് പെരിയ അരങ്ങനടുക്കത്ത് സ്വദേശി വിനോദാണ് മരിച്ചത്. 33 വയസായിരുന്നു. ഇക്കഴിഞ്ഞ വ്യാഴാഴ്ച്ചയാണ് വിനോദിന്റെ ഭാര്യ മറ്റൊരാള്‍ക്കൊപ്പം ഒളിച്ചോടിയത്. രണ്ടു ദിവസം ഭാര്യയെ അന്വേഷിച്ചിട്ടും കണ്ടെത്താനാവാതിരുന്നതോടെ വിനോദ് പൊലീസില്‍ പരാതി നല്‍കി. പരാതി അന്വേഷിച്ച ബേക്കല്‍ പൊലീസ് പയ്യന്നൂര്‍ സ്വദേശിയായ യുവാവിനൊപ്പം യുവതി കഴിഞ്ഞുവരികയാണെന്ന് കണ്ടെത്തി. സ്റ്റേഷനിലേക്ക് ഇരുവരെയും പൊലീസ് വിളിച്ചുവരുത്തി നടത്തിയ മദ്ധ്യസ്ഥ ചര്‍ച്ചകള്‍ വിജയിച്ചില്ല. കാമുകനൊപ്പം ജീവിക്കാനാണ് തനിക്ക് താല്‍പ്പര്യമെന്ന് യുവതി സ്റ്റേഷനില്‍ വെച്ച് വ്യക്തമാക്കി. ഇതോടെയാണ് വിനോദ് വീട്ടിലേക്ക് തിരികെയെത്തിയത്. ഉടന്‍ വീട്ടുവളപ്പില്‍ ജീവനൊടുക്കുകയായിരുന്നു. ദമ്പതികള്‍ക്ക് രണ്ട് മക്കളുണ്ട്. ഫേസ്ബുക്കിലൂടെയാണ് പയ്യന്നൂര്‍ സ്വദേശിയായ യുവാവിനെ യുവതി പരിചയപ്പെടുന്നത്. പിന്നാലെ ഒളിച്ചോടുകയായിരുന്നു.