ജനങ്ങളെ അവഗണിച്ച ബജറ്റ് ചുരുക്കമാണ്; സാധാരണക്കാരെ കളിയാക്കുന്ന ബജറ്റെന്ന് തോമസ് ഐസക്

കേന്ദ്രബജറ്റ് സാധാരണക്കാരെ കളിയാക്കുന്നതാണെന്ന് മുന്‍ സംസ്ഥാന ധനമന്ത്രി ടി എം തോമസ് ഐസക്. ഇതുപോലെ ജനങ്ങളെ അവഗണിച്ച ബജറ്റ് ചുരുക്കമാണ്. തൊഴിലുറപ്പ് വിഹിതം വര്‍ധിപ്പിച്ചു എന്ന എന്ന വാദവും തെറ്റാണ്. വിഹിതം കൂട്ടിയത് വിദ്യാഭ്യാസ മേഖലയ്ക്ക് മാത്രമാണ്. വിലക്കയറ്റം നിയന്ത്രിക്കാന്‍ നടപടി ഇല്ല. സ്വത്ത് എല്ലാം അതിസമ്പന്നരുടെ കയ്യിലാണ്. സാമ്പത്തിക അസമത്വത്തിന് ഈ ബജറ്റ് പരിഹാരം അല്ല. കേരളത്തില്‍ ജി.എസ്.ടി വരുമാനം ഉയര്‍ന്നിട്ടുണ്ട്. ഐ.ജി.എസ്.ടി പ്രതീക്ഷയ്ക്ക് അനുസരിച്ചല്ല വരുന്നത്. പുറത്തു നിന്നു ചരക്ക് വരുമ്പോള്‍ കേരളത്തില്‍ ചോര്‍ച്ച വരുന്നു. ഇക്കാര്യം ജി.എസ്.ടി വകുപ്പ് പരിശോധിക്കുന്നുണ്ടാകും. കഴിഞ്ഞ വര്‍ഷം 98,000 കോടി ആയിരുന്നു റിവൈസ്ഡ് എസ്റ്റിമേറ്റ്. ഈ വര്‍ഷം അത് 73,000 കോടിയായി. കാര്‍ഷിക അടങ്കല്‍ കഴിഞ്ഞ വര്‍ഷം 5.74 ലക്ഷം കോടിയായിരുന്നു. ഈ വര്‍ഷം 4.63 കോടിയായി. വിഹിതത്തില്‍ 29% കുറവ് വന്നു. ആരോഗ്യമേഖലയ്ക്ക് 86,000 കോടിയാണ് കഴിഞ്ഞ വര്‍ഷം അനുവദിച്ചത്. ഈ വര്‍ഷവും 86,000 കോടി തന്നെയാണ്. എല്‍.ഐ.സി വില്‍ക്കാന്‍ ശ്രമിച്ചാല്‍ കര്‍ഷക സമരത്തേക്കാള്‍ വലിയ സമരം ഉണ്ടാകും. ബോണസ് ഇല്ലാതാവുന്ന കാര്യം പോളിസി ഉടമകള്‍ അറിഞ്ഞിട്ടില്ല. അത്ര വേഗം എല്‍.ഐ.സി സ്വകാര്യവല്‍ക്കരണം നടപ്പാകാന്‍ പോകുന്നില്ലെന്നും തോമസ് ഐസക് പറഞ്ഞു. പദ്ധതികള്‍ക്ക് തുക നീക്കിവെക്കുന്നത് എങ്ങനെ എന്ന് അറിയാത്ത ആളാണ് വി മുരളീധരന്‍. ഓരോ പദ്ധതിക്കും പ്രത്യേകം പണം വെയ്ക്കുന്ന പതിവ് ഇല്ലെന്നും ഐസക് പറഞ്ഞു.