ബെംഗളൂരുവിലെ വ്യാപാരിയുടെ കൈയില്‍ നിന്ന് ആറ് കാറുകള്‍ തട്ടിയെടുത്തു; മോണ്‍സണെതിരെ ഒരു കേസ് കൂടി

സാമ്പത്തിക തട്ടിപ്പ് കേസില്‍ പിടിയിലായ മോന്‍സണ്‍ മാവുങ്കലിനെതിരെ ഒരു കേസ് കൂടി. ബെംഗളൂരുവിലെ വ്യാപാരിയുടെ കൈയില്‍ നിന്ന് ആറ് കാറുകള്‍ തട്ടിയെടുത്തതിനാണ് പുതിയ കേസ്. 20 കാറുകള്‍ വിറ്റ ത്യാഗരാജന് ആറ് കാറുകളുടെ വിലയായ 86 ലക്ഷം നല്‍കിയില്ലെന്നാണ് പരാതി. പണം നല്‍കാതെ തട്ടിയെടുത്ത കേസ് ക്രൈം ബ്രാഞ്ച് അന്വേഷിക്കും. ഇതിനിടെ മോന്‍സന്‍ മാവുങ്കലില്‍നിന്ന് പിടിച്ചെടുത്ത ശില്‍പങ്ങള്‍ ശില്‍പി സുരേഷിന് നല്‍കാന്‍ കോടതി ഉത്തരവിട്ടിരുന്നു. ക്രൈം ബ്രാഞ്ചിന്റെ കൈവശമുള്ള ഒമ്പത് ശില്‍പങ്ങള്‍ വിട്ടുനല്‍കാനാണ് തിരുവനന്തപുരം ഒന്നാം ക്ലാസ് ജുഡീഷ്യല്‍ മജിസ്ട്രേറ്റ് കോടതി ഉത്തരവിട്ടത്. പൗരാണിക കാലത്തോളം പഴക്കമുണ്ടെന്ന് അവകാശപ്പെട്ട് മോന്‍സണ്‍ മാവുങ്കല്‍ പ്രദര്‍ശിപ്പിച്ച വിശ്വരൂപം ഉള്‍പ്പെടെ പല ശില്‍പങ്ങളും കോവളം സ്വദേശിയായ ശില്‍പി സുരേഷ് നിര്‍മിച്ചതാണ്. ഈ ശില്‍പങ്ങള്‍ തിരിച്ചുനല്‍കണമെന്നാണ് ഉത്തരവ്. കോടതിയില്‍ സൂക്ഷിച്ചിരുന്ന സിംഹത്തിന്റെ ശില്‍പം സുരേഷിന് തിരിച്ചുനല്‍കിയിട്ടുണ്ട്. ക്രൈം ബ്രാഞ്ചിന്റെ പക്കലുള്ള ബാക്കി ശില്‍പങ്ങള്‍ തിങ്കളാഴ്ച നല്‍കണമെന്നാണ് കോടതി നിര്‍ദേശിച്ചിരിക്കുന്നത്. ശില്‍പങ്ങള്‍ വിട്ടുനല്‍കണമെന്നാവശ്യപ്പെട്ട് ശില്‍പി സുരേഷാണ് കോടതിയില്‍ ഹര്‍ജി നല്‍കിയത്. ഏകദേശം ഒരു കോടിയോളം രൂപ വിലമതിക്കുന്ന ശില്‍പങ്ങളാണ് ഇവ.