അതിവിദഗ്ധമായി ബസില്‍ യുവതിയുടെ മോഷണം; ക്യാമറയില്‍ കുടുങ്ങി

തൃശ്ശൂര്‍ സ്വകാര്യ ബസില്‍ യാത്രക്കിടെ യാത്രക്കാരിയുടെ പഴ്സ് മോഷ്ടിച്ച് യുവതി. മോഷണത്തിന്റെ ദൃശ്യങ്ങള്‍ സമൂഹമാധ്യമങ്ങളില്‍ പങ്കുവച്ച് തൃശൂര്‍ സിറ്റി പൊലീസ്. കഴിഞ്ഞ ദിവസമാണ് സംഭവം. മോഷണദൃശ്യങ്ങള്‍ ബസിനുള്ളിലെ സിസിടിവി ക്യാമറയില്‍ പതിഞ്ഞു. പഴ്സ് നഷ്ടപ്പെട്ട വിവരം യാത്രക്കാരി അറിഞ്ഞിരുന്നില്ല. മോഷണം നടന്നതായി മനസ്സിലായപ്പോള്‍ പൊലീസില്‍ പരാതി നല്‍കി. പഴ്സ് ഉടമയുടെ പിന്നില്‍ നില്‍ക്കുന്ന യുവതി ഷാള്‍ കൊണ്ട് ബാഗ് മറച്ചു. തുടര്‍ന്ന് ബാഗില്‍നിന്ന് പഴ്സ് മോഷ്ടിച്ചു. ഈ ദൃശ്യങ്ങളാണ് സിസിടിവി ക്യാമറയില്‍ പതിഞ്ഞത്. പ്രതിയെ കണ്ടെത്താന്‍ ദൃശ്യങ്ങള്‍ പൊലീസ് സമൂഹമാധ്യമങ്ങളില്‍ പ്രചരിപ്പിച്ചു. മോഷണത്തിന്റെ വിഡിയോ പങ്കുവച്ച തൃശൂര്‍ പൊലീസിന്റെ പോസ്റ്റ് വൈറലായതിനെ തുടര്‍ന്നാണ് സംഭവം പുറംലോകമറിഞ്ഞത്. 'തന്റെ ദേഹത്ത് മോഷ്ടാവ് സ്പര്‍ശിച്ചിട്ടേ ഇല്ല, അതിനാല്‍ മോഷണം നടന്നത് അറിഞ്ഞതുമില്ല. രാവിലെ സിസിടിവി ദൃശ്യങ്ങള്‍ കണ്ടപ്പോള്‍ ഞെട്ടിപ്പോയി'- ഫെയ്സ്ബുക്ക് കമന്റിലൂടെ യുവതി പറഞ്ഞു. എന്തെങ്കിലും വിവരം ലഭിക്കുന്നവര്‍ പൊലീസുമായി ബന്ധപ്പെടണമെന്നും നിര്‍ദേശമുണ്ട്.