സംസ്ഥാനത്ത് കോവിഡ് കേസ് കുറയുന്നു; പ്രതിദിന മരണനിരക്ക് കൂടുന്നതില്‍ ആശങ്ക

സംസ്ഥാനത്തെ കോവിഡ് വ്യാപനത്തോത് കുറയുന്നു. ടെസ്റ്റ് പോസിറ്റിവിറ്റി റേറ്റ് (ടിപിആര്‍) ഒരു മാസത്തിനു ശേഷം 35നു താഴെയെത്തി. എന്നാല്‍ ഇരുന്നൂറോളം പ്രതിദിന മരണങ്ങള്‍ ആശങ്കയാണ്. വെള്ളിയാഴ്ച 38,684 കോവിഡ് കേസുകളാണ് സ്ഥിരീകരിച്ചത്, ടിപിആര്‍ 32.10%. ആഴ്ചകള്‍ക്ക് ശേഷമാണ് രോഗികളുടെ എണ്ണം 40,000ന് താഴെയും ടിപിആര്‍ 40നു താഴെയും എത്തുന്നത്. ജനുവരി ആദ്യ ആഴ്ചയില്‍ 45 ശതമാനവും രണ്ടാംആഴ്ചയില്‍ 148 ശതമാനവും മൂന്നാം ആഴ്ചയില്‍ 215 ശതമാനവും ആയി കേസുകള്‍ വര്‍ധിച്ചിരുന്നു. എന്നാല്‍ ജനുവരി 28ന് ശേഷം ഫെബ്രുവരി മൂന്നു വരെ രോഗവ്യാപന നിരക്ക് 10 ശതമാനമായി കുറഞ്ഞു. സി കാറ്റഗറിയില്‍ ഉള്‍പ്പെടുത്തി കടുത്ത നിയന്ത്രണമേര്‍പ്പെടുത്തിയിരുന്ന തിരുവനന്തപുരം, കോട്ടയം, പത്തനംതിട്ട, ഇടുക്കി ജില്ലകളില്‍ രോഗവ്യാപന നിരക്ക് കാര്യമായി കുറഞ്ഞു. ഇളവുകള്‍ നിലവില്‍ വന്ന ഈ ജില്ലകളില്‍ തിയറ്ററുകളും ജിംനേഷ്യങ്ങളും തുറന്നു. രോഗവ്യാപനനിരക്ക് കുറഞ്ഞെങ്കിലും മരണനിരക്ക് ഉയരുകയാണ്. മൂന്നാം തരംഗത്തിലെ മരണനിരക്ക് വെള്ളിയാഴ്ച ഏറ്റവും ഉയര്‍ന്ന കണക്കില്‍ എത്തി. 24 മണിക്കൂറിനിടെ 28 മരണവും രേഖകള്‍ ഹാജരാക്കിയ 197 മരണവും ഉള്‍പ്പെടെ 225 മരണമാണ് ഒറ്റ ദിവസം സ്ഥിരീകരിച്ചത്. ജനുവരിയില്‍ മാത്രം 1500 പേര്‍ മരണത്തിനു കീഴടങ്ങി. മരണങ്ങളുടെ കാരണം വിശദമായി പഠിക്കണമെന്ന് ആരോഗ്യ വിദഗ്ധര്‍ ആവശ്യപ്പെട്ടിരുന്നെങ്കിലും ഫലം കണ്ടിട്ടില്ല.