വിദ്യാര്‍ഥികള്‍ തമ്മിലുള്ള പ്രശ്നത്തിലിടപ്പെട്ട് കത്തിവീശി,അറസ്റ്റിലായി,ഗുണ്ടാപട്ടികയില്‍ ചേര്‍ത്തു

മലപ്പുറം: മേല്‍മുറി പ്രിയദര്‍ശിനി കോളേജിലെ കുട്ടികള്‍ക്കുനേരെ കത്തിവീശിയ മേല്‍മുറി 27 സ്വദേശി നടുത്തൊടി ജുനൈദുള്ള(29)യെ മലപ്പുറം പോലീസ് അറസ്റ്റുചെയ്തു. കുട്ടികള്‍ പരാതിനല്‍കാന്‍ തയ്യാറാകാതിരുന്നതിനാല്‍ പോലീസ് സ്വമേധയാ ആണ് കേസെടുത്തത്. ഇയാളെ ഗുണ്ടാപട്ടികയില്‍ ഉള്‍പ്പെടുത്തുകയുംചെയ്തു. വ്യാഴാഴ്ചയാണ് ഒന്നാംവര്‍ഷ ബിരുദ വിദ്യാര്‍ഥികളും അവസാനവര്‍ഷ വിദ്യാര്‍ഥികളും തമ്മിലുള്ള വാക്കേറ്റം സംഘര്‍ഷത്തില്‍ കലാശിച്ചത്. വിഷയത്തില്‍ ഇടപെടാനെത്തിയ കോളേജിന് പുറത്തുനിന്നുള്ള ജുനൈദുള്ള വിദ്യാര്‍ഥികള്‍ക്കുനേരെ കത്തിവീശുകയായിരുന്നു. വിദ്യാര്‍ഥികള്‍ക്കുനേരെ ആക്രോശിച്ച്, അരയില്‍ തിരുകിയ കത്തി പുറത്തെടുത്തു വീശുന്നതും കൈയേറ്റംചെയ്യുന്നതും കൂടിനിന്നവര്‍ മൊബൈല്‍ഫോണില്‍ പകര്‍ത്തുകയായിരുന്നു. വീഡിയോ സമൂഹമാധ്യമത്തില്‍ പ്രചരിച്ചിരുന്നു.