കയ്യില്‍ മുറിവേറ്റ കൊലയാളി?: വിനീതയെ കൊന്നതാര്: രേഖാചിത്രം പുറത്തുവിട്ടു

പട്ടാപ്പകല്‍ റോഡരികിലെ അലങ്കാരച്ചെടി വില്‍പ്പനശാലയിലെ ജീവനക്കാരി കടയ്ക്കുള്ളില്‍ കുത്തേറ്റു മരിച്ച സംഭവത്തില്‍ പങ്കുണ്ടെന്നു സംശയിക്കുന്ന ആളുടെ രേഖാചിത്രവും സിസിടിവി ദൃശ്യവും പൊലീസ് പുറത്തു വിട്ടു. അമ്പലംമുക്ക്-കുറവന്‍കോണം റോഡിലെ കടയിലെ ജീവനക്കാരി, നെടുമങ്ങാട് കരിപ്പൂര്‍ വാണ്ട ചാരുവള്ളിക്കോണത്തിനു സമീപം കുന്നുംപുറത്തുവീട്ടില്‍ വിനീത വിജയന്‍ (38) ആണ് കഴിഞ്ഞ ഞായറാഴ്ച കൊല്ലപ്പെട്ടത്. കഴുത്തില്‍ ആഴത്തിലുള്ള മുറിവേറ്റിരുന്നു. കുത്തികൊലപ്പെടുത്തിയശേഷം ടാര്‍പ്പോളിന്‍ കൊണ്ടു മൂടിയിട്ട നിലയിലായിരുന്നു മൃതദേഹം. ഞായറാഴ്ച രാവിലെ 11 മണിയോടെ കടയിലേക്ക് ഒരാള്‍ കയറിപോകുന്നതും തുടര്‍ന്ന് 20 മിനിട്ടിനുള്ളില്‍ പുറത്തേക്കു പോകുന്നതും സമീപത്തെ സിസിടിവി ദൃശ്യങ്ങളിലുണ്ട്. കടയില്‍നിന്ന് പുറത്തിറങ്ങുമ്പോള്‍ ഇയാളുടെ കയ്യില്‍ മുറിവേറ്റിട്ടുണ്ട്. അതിനുശേഷം ഉച്ചവരെ കടയിലേക്ക് ആരും വന്നിട്ടില്ല. കയ്യില്‍ മുറിവേറ്റതിനാല്‍ ഇയാളെ കണ്ടെത്താന്‍ വേഗത്തില്‍ കഴിയുമെന്ന പ്രതീക്ഷയിലാണ് പൊലീസ്. ഇയാള്‍ ആശുപത്രികളില്‍ ചികില്‍സ തേടിയോ എന്ന കാര്യം അന്വേഷിക്കുന്നുണ്ട്. ഞായറാഴ്ച ഒരാള്‍ മാത്രമേ കടയില്‍ ഉണ്ടാകാറുള്ളൂ. 3 ജീവനക്കാരില്‍ വിനീതയ്ക്കായിരുന്നു ഞായറാഴ്ചത്തെ ഡ്യൂട്ടി. ചെടിവാങ്ങാനെത്തിയവര്‍ കടയില്‍ ആരെയും കാണാത്തതിനെ തുടര്‍ന്ന് ഉടമയെ ഫോണില്‍ വിളിച്ചറിയിക്കുകയായിരുന്നു. ഫോണ്‍ എടുക്കാത്തതിനെ തുടര്‍ന്ന് ഉടമ സമീപത്തെ കടയിലെ ജീവനക്കാരിയെ വിവരം തിരക്കാന്‍ പറഞ്ഞയച്ചു. അവരാണ് മൃതദേഹം ആദ്യം കണ്ടത്. വിനീതയുടെ കഴുത്തിലുണ്ടായിരുന്ന 4 പവന്റെ മാല കാണാനില്ലെന്നു ബന്ധുക്കള്‍ മൊഴി നല്‍കിയിട്ടുണ്ട്. വിനീതയുടെ ഭര്‍ത്താവ് സെന്തില്‍ കുമാര്‍ രണ്ടു വര്‍ഷം മുന്‍പ് മരിച്ചിരുന്നു. 9 മാസം മുന്‍പാണ് വിനീത ഈ സ്ഥാപനത്തില്‍ ജോലിക്കു കയറിയത്.