റാലി താരം ജവീന്‍ കോട്ടയത്ത് ബൈക്കപകടത്തില്‍ മരിച്ചു

റാലി താരവും റോയല്‍ എന്‍ഫീല്‍ഡ് ആദ്യകാല ഡീലറുമായ ജവീന്‍ മാത്യു (52) ബൈക്കപകടത്തില്‍ മരിച്ചു. കോട്ടയം യൂണിയന്‍ ക്ലബ്ബിന് സമീപം ഉണ്ടായ അപകടത്തിലായിരുന്നു മരണം. മലേഷ്യയിലെ റെയിന്‍ഫോറസ്റ്റ് ചാലഞ്ച്, റെയ്ഡ് ദി ഹിമാലയ, പോപ്പുലര്‍ റാലി, റോയല്‍ എന്‍ഫീല്‍ഡ് ട്രിപ് സഞ്ചാരങ്ങള്‍ എന്നിവയിലെ സജീവ സാന്നിധ്യമായിരുന്നു. രാജ്യാന്തര ശ്രദ്ധ നേടിയ നിരവധി ബൈക്ക് രൂപമാറ്റങ്ങള്‍ ജവീന്‍ നിര്‍വഹിച്ചിട്ടുണ്ട്. റോയല്‍ എന്‍ഫീല്‍ഡ് റൈഡര്‍മാനിയയില്‍ ഒന്നിലധികം തവണ ജവീന്റെ രൂപകല്‍പനകള്‍ സമ്മാനാര്‍ഹമായി. ഇന്ത്യയ്ക്ക് പുറത്തു നടത്തിയ ബൈക്ക് യാത്രകളിലൂടെയും ശ്രദ്ധേയനാണ്. 'ജവീന്‍സ് റോയല്‍ എന്‍ഫീല്‍ഡ്' ഉടമയായ ജവീന് മുന്‍പ് അപൂര്‍വമായ വിന്റേജ് വാഹനങ്ങളുടെ ശേഖരവുമുണ്ടായിരുന്നു. കോട്ടയം ജീപ്പേഴ്‌സ് ക്ലബ് സെക്രട്ടറി, നഗരസഭ കൗണ്‍സിലര്‍, സിഎസ്െഎ സഭാ കൗണ്‍സില്‍ അംഗം, കോട്ടയം വൈഎംസിഎ മുന്‍ വൈസ് പ്രസിഡന്റ് എന്നീ സ്ഥാനങ്ങള്‍ വഹിച്ചിട്ടുണ്ട്. ചാലുകുന്ന് മണപ്പുറത്ത് വീട്ടില്‍ പരേതനായ ജോണ്‍ മാത്യുവിന്റെ പുത്രനാണ്. ഭാര്യ അനു. മക്കള്‍: കര്‍മ, കാമറിന്‍, കേരള്‍. സംസ്‌കാരം പിന്നീട്.