‘റോയി വയലാറ്റ് മകളെ ബലമായി കയറിപ്പിടിച്ചു; ഹോട്ടലില്‍നിന്ന് ഇറങ്ങിയോടി’

നമ്പര്‍ 18 ഹോട്ടലില്‍ ഡിജെ പാര്‍ട്ടിക്കിടെ തന്നെയും മകളെയും ഉപദ്രവിച്ചെന്നു ഹോട്ടല്‍ ഉടമ റോയി വയലാറ്റിനെതിരായ പരാതിയില്‍ കോഴിക്കോട് സ്വദേശിനി. പതിനേഴുകാരിയായ മകളെ ബലമായി കയറിപ്പിടിച്ചെന്നും അമ്മ പരാതിയില്‍ പറയുന്നു. മിസ് കേരള മുന്‍ ജേതാക്കളായ മോഡലുകളുടെ അപകട മരണക്കേസിലെ പ്രതിയാണ് റോയി വയലാറ്റ്. റോയിയുടെ കൂട്ടുപ്രതിയും ലഹരിക്കച്ചവടക്കാരനുമായ സൈജു തങ്കച്ചന്‍, കൂട്ടാളി അഞ്ജലി എന്നിവര്‍ക്ക് എതിരെയും പരാതിയുണ്ട്. ഫാഷന്‍ രംഗത്തു തൊഴില്‍ വാഗ്ദാനം ചെയ്ത് അഞ്ജലിയാണു പെണ്‍കുട്ടിയെയും അമ്മയെയും കൊച്ചിയിലേക്കു കൂട്ടികൊണ്ടുവന്നത്. കോഴിക്കോട് സംരംഭകയായി അറിയപ്പെടുന്ന അഞ്ജലിയെ വിശ്വസിച്ച് 5 യുവതികള്‍ കൂടി കൊച്ചിയിലെത്തിയിരുന്നു. പ്രായപൂര്‍ത്തിയാകാത്ത പെണ്‍കുട്ടിയെ തന്ത്രപൂര്‍വം അഞ്ജലിയും സൈജുവും ചേര്‍ന്നു നമ്പര്‍ 18 ഹോട്ടലില്‍ എത്തിക്കുകയായിരുന്നു. ഹോട്ടലില്‍ വച്ചു റോയി ലൈംഗികമായി ഉപദ്രവിച്ചെന്നാണു പരാതി. അഞ്ജലിയെ അല്ലാതെ മറ്റാരെയും പെണ്‍കുട്ടിക്കു മനസ്സിലായിരുന്നില്ല. മോഡലുകള്‍ കൊല്ലപ്പെട്ട വാര്‍ത്തകളിലൂടെ റോയിയെയും സൈജുവിനെയും തിരിച്ചറിഞ്ഞ പെണ്‍കുട്ടിയും അമ്മയും കോഴിക്കോട് പൊലീസിനോടു പരാതിപ്പെട്ടിരുന്നു. പിന്നീട് ജനുവരി 31നു കൊച്ചിയിലെത്തി പരാതി നല്‍കി. സംഭവദിവസം പെണ്‍കുട്ടിയും മാതാവും ഹോട്ടലില്‍ നിന്ന് ഇറങ്ങിയോടി രക്ഷപ്പെടുകയായിരുന്നു സമാന സാഹചര്യത്തിലാണു മോഡലുകളായ 2 യുവതികളും 2 സുഹൃത്തുക്കളുടെ സഹായത്തോടെ കാറില്‍ രക്ഷപ്പെടാന്‍ ശ്രമിക്കുന്നതിനിടയില്‍ അപകടത്തില്‍ മരിച്ചത്. പെണ്‍കുട്ടിയെ ഉപദ്രവിച്ച സംഭവം പുറത്തു പറയാതിരിക്കാന്‍ പ്രതികള്‍ ഭീഷണിപ്പെടുത്തിയിരുന്നു. ഇവരുടെ കുളിമുറി ദൃശ്യങ്ങള്‍ പുറത്തുവിടുമെന്നായിരുന്നു ഭീഷണി. ഫോര്‍ട്ട്‌കൊച്ചി പൊലീസ് തുടരന്വേഷണത്തിനായി കേസ് പ്രത്യേക അന്വേഷണ സംഘത്തിനു കൈമാറി.