അപകടത്തില്‍ കാല്‍ തകര്‍ന്നയാള്‍ക്ക് 5.76 കോടി നഷ്ടപരിഹാരം; പലിശയും കോടതിച്ചെലവും നല്‍കണം

കൊല്ലം : വാഹനാപകടത്തില്‍ കാല്‍ തകര്‍ന്നയാള്‍ക്ക് 5.76 കോടി രൂപ ഇന്‍ഷുറന്‍സ് കമ്പനി നഷ്ടപരിഹാരം നല്‍കണമെന്ന് കൊല്ലം മോട്ടോര്‍ ആക്‌സിഡന്റ് ക്ലെയിംസ് ട്രിബ്യൂണല്‍ ജഡ്ജി എം.സുലേഖ ഉത്തരവിട്ടു. ശാസ്താംകോട്ട ജമിനി ഹൈറ്റ്‌സ് ഉടമ ശാസ്താംകോട്ട മനക്കര മുറിയില്‍ ജമിനി ദാസി(55)നാണ് നഷ്ടപരിഹാരം അനുവദിച്ചത്. നഷ്ടപരിഹാരത്തുകയായ 5,76,52,564 രൂപ ഈടാക്കുന്നതുവരെ വര്‍ഷം എട്ടുശതമാനം പലിശയും കോടതിച്ചെലവും നല്‍കണമെന്നും ഉത്തരവില്‍ പറയുന്നു. 2015 മേയ് 23-നാണ് അപകടമുണ്ടായത്. കൊല്ലം രാമന്‍കുളങ്ങര കല്ലൂര്‍കാവ് ക്ഷേത്രത്തിനുസമീപം റോഡരികില്‍നിന്ന ജമിനിദാസിനെ കാര്‍ ഇടിച്ചു തെറിപ്പിക്കുകയായിരുന്നു. ഗുരുതരമായി പരിക്കേറ്റ അദ്ദേഹത്തിന്റെ വലതുകാലിനുണ്ടായ തകരാര്‍ പരിഹരിക്കാന്‍ കഴിഞ്ഞിട്ടില്ല. ഷാര്‍ജയില്‍ ബിസിനസ് നടത്തുകയായിരുന്നു ജെമിനിദാസ്. അപകടത്തെ തുടര്‍ന്ന് അദ്ദേഹത്തിന് ബിസിനസ് തുടരാനായില്ല. അന്നത്തെ വരുമാനവും അപകടമുണ്ടായില്ലെങ്കില്‍ തുടര്‍ന്ന് വരുമാനത്തിലുണ്ടായേക്കാമായിരുന്ന വര്‍ധനയും വൈകല്യവും പ്രായവും കണക്കാക്കിയാണ് നഷ്ടപരിഹാരത്തുക നിശ്ചയിച്ചത്. ജമിനിദാസിനുവേണ്ടി അഭിഭാഷകനായ ശൂരനാട് പി.ആര്‍.രവീന്ദ്രന്‍ പിള്ള ഹാജരായി.