15 വര്‍ഷത്തെ കാത്തിരിപ്പിനൊടുവില്‍ ഒറ്റപ്രസവത്തില്‍ നാല് കുഞ്ഞുങ്ങള്‍

കോട്ടയം: 15 വര്‍ഷത്തെ കാത്തിരിപ്പിനൊടുവില്‍ ഒറ്റപ്രസവത്തില്‍ നാല് കുഞ്ഞുങ്ങളെന്ന വലിയ സന്തോഷത്തിലാണ് ദമ്പതികളായ സുരേഷും പ്രസന്നയും. എന്നാല്‍ ചികിത്സ സൃഷ്ടിച്ച ബാധ്യത കാരണം കുഞ്ഞുങ്ങള്‍ക്കൊപ്പമുള്ള മുന്നോട്ടുള്ള ജീവിതം ഇവര്‍ക്ക് ഇപ്പോള്‍ പ്രതിസന്ധിയാണ്.നീണ്ട 15 വര്‍ഷത്തെ കാത്തിരിപ്പിന് ഒടുവില്‍ ഭാഗ്യം കടാക്ഷിച്ചത് നാല് പൊന്നോമനകളായി. മൂന്ന് ആണ്‍ കുഞ്ഞുങ്ങളും ഒരു പെണ്‍കുഞ്ഞും. പ്രസന്നയും സുരേഷും സന്തോഷ നെറുകയിലാണ്. പക്ഷേ പ്രതിസന്ധികളാണ് മുന്നില്‍. തെങ്ങ് കയറ്റ തൊഴിലാളിയായ സുരേഷ് അപകടത്തില്‍ പരിക്കേറ്റതോടെ ജോലിക്ക് പോകുന്നില്ല. കുഞ്ഞുങ്ങളെ നോക്കാന്‍ പ്രസന്നയും ജോലി ഉപേക്ഷിച്ചു. കടം വാങ്ങിയായിരുന്നു സ്വകാര്യ ആശുപത്രിയിലെ ചികിത്സ. ഇതോടെ വന്‍ ബാധ്യതക്കാരായി. കുഞ്ഞുങ്ങള്‍ക്കുള്ള സാധനങ്ങള്‍ വാങ്ങാന്‍ പോലും ഇപ്പോള്‍ ബുദ്ധിമുട്ടുകയാണ്.സുഹൃത്തുകളുടേയും ബന്ധുക്കളുടേയും കരുതലിലാണ് ജീവിതം. ആഗ്രഹിച്ച് കിട്ടിയ പൊന്നോമനകള്‍ക്കൊപ്പം ബാധ്യതകളില്ലാത്ത ഭാവിയാണ് ആഗ്രഹം. അതിനായി നല്ല മനസുകളുടെ കൈത്താങ്ങ് പ്രതീക്ഷിക്കുകയാണ് സുരേഷും പ്രസന്നയും