രാധാകൃഷ്ണന് മാനസികാസ്വാസ്ഥ്യമുണ്ട്; ബാബുവിനെ രക്ഷിച്ച സംഘത്തിലും ഉണ്ടായിരുന്നു എന്ന് വനംവകുപ്പ്

പാലക്കാട് ചെറാട് കൂര്‍മ്പാച്ചി മലയില്‍ നിന്ന് രക്ഷപ്പെടുത്തിയ രാധാകൃഷ്ണന് മാനസികാസ്വാസ്ഥ്യമുണ്ടെന്ന് വനംവകുപ്പ്. കുറേ കാലമായി ഇവിടെയൊക്കെ അലഞ്ഞുതിരിഞ്ഞ് നടക്കുന്ന ആളാണ്. മറ്റ് ജോലികളൊന്നും ഇല്ല. ഇയാള്‍ മാത്രമേ ഉണ്ടായിരുന്നുള്ളൂ. രണ്ട് മൂന്ന് സ്ഥലങ്ങളില്‍ പോയി രാധാകൃഷ്ണന്‍ ടോര്‍ച്ച് അടിച്ചിരുന്നു. നേരത്തെ ബാബുവിനെ രക്ഷിക്കാന്‍ പോയ സംഘത്തിലും രാധാകൃഷ്ണന്‍ ഉണ്ടായിരുന്നു എന്നും വനംവകുപ്പ് പറയുന്നു. മലയില്‍ കൂടുതല്‍ ആളുകളുണ്ടെന്ന് നാട്ടുകാര്‍ പറയുന്നു. രണ്ടോ മൂന്നോ ഫ്‌ലാഷ് ലൈറ്റുകള്‍ മലയില്‍ കണ്ടു എന്നും ഒന്നില്‍ കൂടുതല്‍ ആളുകള്‍ മലയിലുണ്ട് എന്നും ആളുകള്‍ പറയുന്നു. എന്നാല്‍, ഇത് വനംവകുപ്പ് നിഷേധിച്ചു. തങ്ങള്‍ ഫ്‌ലാഷ് ലൈറ്റുകളുടെ ചിത്രം എടുത്തിട്ടുണ്ടെന്നും പിന്നെ എങ്ങനെ ഇത് നിഷേധിക്കാന്‍ കഴിയുമെന്നും ആളുകള്‍ ചോദിക്കുന്നു. തനിക്കൊപ്പം ആരും ഉണ്ടായിരുന്നില്ല എന്നാണ് രാധാകൃഷ്ണന്‍ നല്‍കിയ മൊഴി. മലയുടെ പരിസരം ഈ യുവാവിന് കൃത്യമായി അറിയാമായിരുന്നെന്നാണ് പ്രദേശവാസികള്‍ വിലയിരുത്തുന്നത്. വനംവകുപ്പ് ഉദ്യോഗസ്ഥര്‍ ഇയാളെ കണ്ടെത്തി ബേസ് ക്യാംപില്‍ എത്തിച്ചിട്ടുണ്ട്. വനംവകുപ്പിന്റെ ജീപ്പില്‍ അവരെ കൊണ്ടുവരികയാണെന്ന് മാധ്യമപ്രവര്‍ത്തകന്‍ ജോണ്‍ വര്‍ഗീസ് 24നോട് പറഞ്ഞു. തിരച്ചിലിനു പോയ മുഴുവന്‍ സംഘങ്ങളും തിരികെ എത്തി. വഴി തെറ്റിപ്പോയതാണെന്ന് രാധാകൃഷ്ണന്‍ പറഞ്ഞു എന്നാണ് വിവരം. വൈകിട്ട് 6 മണിയോടെയാണ് രാധാകൃഷ്ണന്‍ മലയിലേക്ക് പോയത്. ഇയാളെ വൈദ്യ പരിശോധനയ്ക്ക് കൊണ്ടുപോയിരിക്കുകയാണ്. ഇതിനു ശേഷം മറ്റ് നടപടികള്‍ തീരുമാനിക്കും. മലയിടുക്കില്‍ നിന്നും സൈന്യം ബാബു എന്ന യുവാവിനെ രക്ഷപ്പെടുത്തിയതുമായി ബന്ധപ്പെട്ട് മറ്റ് യാത്രക്കാര്‍ വിലക്കുകള്‍ ലംഘിച്ച് മലയിലേക്ക് കടന്നതാകാമെന്നായിരുന്നു വെളിച്ചം കണ്ടപ്പോള്‍ നാട്ടുകാര്‍ സംശയിച്ചിരുന്നത്. എന്നാല്‍ ഇത്തരം ആശങ്കകള്‍ക്കെല്ലാം രാധാകൃഷ്ണനെ കണ്ടെത്തിയതോടെ അവസാനമാകുകയാണ്. പ്രദേശവാസി തന്നെയായ രാധാകൃഷ്ണന്‍ എന്തെങ്കിലും ആവശ്യത്തിനായി പോയി തിരിച്ചുവരുന്നതിനിടെ വഴി തെറ്റിയതാകാമെന്നാണ് പ്രാഥമിക വിവരം. സംഭവത്തില്‍ നാളെ മന്ത്രി തല യോഗം നടക്കും. നാളെ രാവിലെ എട്ട് മണിക്ക് പാലക്കാട് വച്ചാണ് യോഗം. വനം മന്ത്രിയും റവന്യൂ മന്ത്രിയും ഉള്‍പ്പെടെ വിവിധ വകുപ്പ് മേധാവികള്‍ പങ്കെടുക്കും.