ടു-ഡിജി കോവിഡ് മരുന്ന്, ഉത്പാദന കൂട്ടാന്‍ കമ്പനികളെ തേടി ഡി.ആര്‍.ഡി.ഒ

ന്യൂഡല്‍ഹി: കോവിഡ് രോഗികളുടെ ചികിത്സയ്ക്കായി ഡിഫന്‍സ് റിസര്‍ച്ച്‌ ആന്‍ഡ് ഡെവലപ്പ്‌മെന്റ് ഓര്‍ഗനൈസേഷന്‍( ഡി.ആര്‍.ഡി.ഒ ) വികസിപ്പിച്ച ടു-ഡിജി മരുന്നിന്റെ ഉത്പാദനത്തിനായി കമ്ബനികളില്‍ നിന്ന് അപേക്ഷ ക്ഷണിച്ചു. താത്പര്യമുള്ള ഇന്ത്യയിലെ മരുന്ന് നിര്‍മാണ കമ്ബനികള്‍ ജൂണ്‍ 17ന് മുമ്ബ് ഡി.ആര്‍.ഡി.ഒയ്ക്ക് അപേക്ഷ സമര്‍പ്പിക്കണം. ചികിത്സയിലുള്ള കോവിഡ് രോഗികള്‍ക്ക് വേഗത്തില്‍ രോഗമുക്തി നല്‍കാനും അനുബന്ധ ഓക്‌സിജനെ ആശ്രയിക്കുന്നത് കുറയ്ക്കാനും ടു-ഡിജി സഹായിക്കുമെന്ന് ക്ലിനിക്കല്‍ പരീക്ഷണങ്ങളില്‍ കണ്ടെത്തിയിരുന്നു. വലിയ തോതില്‍ മരുന്ന് ഉത്പാദിപ്പിക്കാനായി 15 കമ്പനികള്‍ക്കാണ് അനുമതി നല്‍കുക. ലഭിക്കുന്ന അപേക്ഷകള്‍ ടെക്‌നിക്കല്‍ അസെസ്‌മെന്റ് കമ്മിറ്റി പരിശോധിക്കും. മാസം 2000 കിലോഗ്രാം നിര്‍മാണ ശേഷിയും ചുരുങ്ങിയ സമയത്തിനുള്ളില്‍ മരുന്ന് വിപണിയിലേക്ക് എത്തിക്കാനും കമ്ബനികള്‍ക്ക് സാധിക്കണം. കേന്ദ്ര, സംസ്ഥാന സര്‍ക്കാരുകളുടെ വിലക്ക് നേരിടുന്ന മരുന്ന് നിര്‍മ്മാണകമ്ബനികള്‍ക്ക് അപേക്ഷിക്കാനാവില്ല. ഡി.ആര്‍.ഡ.ിഒയുടെ ഉപസ്ഥാപനമായ ന്യൂക്ലിയര്‍ മെഡിസിന്‍ ആന്‍ഡ് അലയഡ് സയന്‍സസും സ്വകാര്യ സ്ഥാപനമായ ഡോ റെഡ്ഡീസ് ലബോറട്ടീസും ചേര്‍ന്നാണ് ടു-ഡിജി വികസിപ്പിച്ചത്. വെള്ളത്തില്‍ അലിയിച്ച്‌ കഴിക്കാവുന്ന പൊടി രൂപത്തിലുള്ള മരുന്നാണിത്. ഡ്രഗ്‌സ് കണ്‍ട്രോളര്‍ ഓഫ് ഇന്ത്യ കഴിഞ്ഞ മാസം മരുന്നിന് അടിയന്തര ഉപയോഗത്തിനുള്ള അനുമതി നല്‍കിയിരുന്നു.