അറസ്റ്റ് തടയാന്‍ ഹൈക്കോടതിയുടെ പേരില്‍ വ്യാജ ഉത്തരവ്; കൊലക്കേസ് പ്രതി കുടുങ്ങി

പൊലീസ് അറസ്റ്റു ചെയ്യുന്നതു തടയാന്‍ പ്രതിയും അഭിഭാഷകനും ചേര്‍ന്നു വ്യാജ ഉത്തരവു ചമച്ചതായി ഹൈക്കോടതിയില്‍ പ്രോസിക്യൂഷന്റെ പരാതി. ഹൈക്കോടതിയുടെ വെബ്‌സൈറ്റില്‍ നിന്നു ലഭിച്ച കേസ് സ്ഥിതി വിവര രേഖയില്‍ കൃത്രിമം നടത്തി വ്യാജ ഉത്തരവു ചമച്ചതായാണ് കണ്ടെത്തിയത്. ഭാര്യയെ കൊലപ്പെടുത്താന്‍ ശ്രമിച്ചെന്ന കേസിലെ പ്രതി പ്രശാന്ത് കുമാറും അദ്ദേഹത്തിന്റെ അഭിഭാഷകനുമാണ് തട്ടിപ്പ് നടത്തിയത്. കേസ് സ്റ്റാറ്റസിന്റെ പിഡിഎഫ് ഫയല്‍ ഡൗണ്‍ലോഡു ചെയ്ത ശേഷം കൃത്രിമ മാറ്റങ്ങള്‍ വരുത്തിയാണ് തെറ്റിദ്ധരിപ്പിക്കാന്‍ ശ്രമമുണ്ടായത്. പ്രതിക്കെതിരെ നടപടി പാടില്ലന്ന് ഇവര്‍ കേസ് സ്റ്റാറ്റസില്‍ രേഖപ്പെടുത്തി. തിരുവനന്തപുരം കരമന പൊലീസ് റജിസ്റ്റര്‍ ചെയ്ത കേസില്‍ പ്രശാന്തിന്റെ മുന്‍കൂര്‍ ജാമ്യാപേക്ഷ ഹൈക്കോടതിയുടെ പരിഗണയില്‍ ഇരിക്കെയാണ് ഇത്. തട്ടിപ്പു ബോധ്യപ്പെട്ടതോടെ പ്രതിയെ പൊലീസ് അറസ്റ്റു ചെയ്തു. ഭാര്യയെ ചിരവകൊണ്ട് അടിച്ചു കൊലപ്പെടുത്താന്‍ ശ്രമിച്ചു എന്ന പേരിലാണ് പൊലീസ് കേസെടുത്തത്. തുടര്‍ന്ന് കഴിഞ്ഞ മാസം ജനുവരി 20ന് ഇയാള്‍ ഹൈക്കോടതിയില്‍ മുന്‍കൂര്‍ ജാമ്യാപേക്ഷ സമര്‍പ്പിച്ചു. തൊട്ടടുത്ത ദിവസം കേസ് പരിഗണിച്ച കോടതി, വിഷയത്തില്‍ സര്‍ക്കാരിന്റെ വിശദീകരണം തേടി. തുടര്‍ന്നു കേസ് പരിഗണിച്ചിരുന്നില്ല. ഇതിനിടെ ഫെബ്രുവരി 12ന് പ്രതിയെ പൊലീസ് കസ്റ്റഡിയില്‍ എടുത്തു. ഒരുമണിയോടെ അഭിഭാഷകന്‍ സ്റ്റേഷനിലെത്തി ഇയാളുടെ അറസ്റ്റ് ഹൈക്കോടതി വിലക്കിയിട്ടുണ്ട് എന്നു കാണിച്ച് കേസ് സ്റ്റാറ്റസ് രേഖ കാണിക്കുകയായിരുന്നു. വാട്‌സാപ് വഴി രേഖ അഭിഭാഷകന്‍ പൊലീസിനു കൈമാറുകയും ചെയ്തു. കേസില്‍ പ്രതി നല്‍കിയ മുന്‍കൂര്‍ ജാമ്യാപേക്ഷയില്‍ സര്‍ക്കാരിന്റെ വിശദീകരണം തേടിയ കോടതി അതുവരെ അറസ്റ്റു പോലെയുള്ള നടപടികള്‍ പാടില്ലെന്നു വിലക്കിയിട്ടുണ്ട് എന്നാണ് വിശദീകരിച്ചത്. എന്നാല്‍ പൊലീസ് ഈ രേഖകളുമായി പ്രോസിക്യൂഷനെ ബന്ധപ്പെട്ടപ്പോഴാണ് രേഖ വ്യാജമാണെന്നു കണ്ടെത്തിയത്. രജിസ്ട്രി മുഖേന ഇതു സ്ഥിരീകരിക്കുകയും ചെയ്തു. തുടര്‍ന്നാണ് അഭിഭാഷകനും പ്രതിക്കുമെതിരെ നടപടി ആവശ്യപ്പെട്ട് പ്രോസിക്യൂഷന്‍ ഹൈക്കോടതി റജിസ്ട്രാര്‍ക്കു പരാതി നല്‍കിയിരിക്കുന്നത്. രേഖ വ്യാജമാണെന്നു വ്യക്തമായതോടെ പ്രതിയുടെ അറസ്റ്റ് പൊലീസ് രേഖപ്പെടുത്തി കേസുമായി മുന്നോട്ടു പോകുകയായിരുന്നു.