പതിവ് കുത്തിവയ്പ്പുകള്‍ കുട്ടികളില്‍ കൊവിഡ് ലഘൂകരിക്കും: പഠനം

കുട്ടിക്കാലത്തെ പ്രതിരോധ കുത്തിവയ്പ്പുകള്‍ എടുക്കുന്ന 15 വയസ്സിന് താഴെയുള്ള കുട്ടികളില്‍ ഗുരുതരമായ കൊവിഡ് ലക്ഷണങ്ങള്‍ ഉണ്ടാകാനുള്ള സാധ്യത കുറവാണെന്ന് ഡല്‍ഹിയിലെ മൗലാന ആസാദ് മെഡിക്കല്‍ കോളജ് (എംഎഎംസി) നടത്തിയ പഠനം വ്യക്തമാക്കുന്നു. MAMC യുടെ കമ്മ്യൂണിറ്റി മെഡിസിന്‍ വിഭാഗത്തിലെ ഗവേഷകര്‍ ആറ് മാസം കൊണ്ട് നടത്തിയ പഠനത്തിലാണ് പുതിയ കണ്ടെത്തല്‍. ക്ഷയരോഗം തടയാന്‍ ബാസിലസ് കാല്‍മെറ്റ്-ഗ്വെറിന്‍ (ബിസിജി) ഒരു ഡോസ്; ഓറല്‍ പോളിയോ വാക്‌സിന്‍ മൂന്ന് ഡോസ്; റോട്ടവൈറസിന്റെ മൂന്ന് ഡോസുകള്‍; പെന്റയുടെ മൂന്ന് ഡോസ് (ഡിഫ്തീരിയ, ടെറ്റനസ്; വില്ലന്‍ ചുമ; ഹെപ്പറ്റൈറ്റിസ്-ബി, ഹീമോഫിലസ് ഇന്‍ഫ്‌ലുവന്‍സ ടൈപ്പ്-ബി; രണ്ട് ഡോസ് ഫ്രാക്ഷണല്‍ ഇന്‍ജക്ടബിള്‍ പോളിയോ വാക്സിന്‍; ഒരു ഡോസ് മീസില്‍സ്-റൂബെല്ല (എംആര്‍) വാക്സിന്‍ എന്നിവ എടുത്തിട്ടുള്ള കുട്ടികളില്‍ ഗുരുതരമായ ലക്ഷണങ്ങള്‍ കുറവാണെന്ന് കണ്ടെത്തി. പഠനത്തിന്റെ ഭാഗമായ കണ്ടെത്തലുകളില്‍ 141 കൊവിഡ് പോസിറ്റീവ് കുട്ടികളില്‍ 88 (62.4%) പേര്‍ക്ക് നേരിയ ലക്ഷണങ്ങളും 9 (6.4%) പേര്‍ക്ക് മിതമായ ലക്ഷണങ്ങളും മൂന്ന് (2.1%) പേര്‍ക്ക് ഗുരുതരമായ രോഗലക്ഷണങ്ങളുമുണ്ടെന്ന് കാണിക്കുന്നു. ബാക്കിയുള്ളവര്‍ (41) രോഗലക്ഷണങ്ങളില്ലാത്തവരാണ്. 141 കുട്ടികളില്‍ 114 പേര്‍ പൂര്‍ണമായും പ്രതിരോധ കുത്തിവയ്പ് എടുത്തവരും 24 പേര്‍ ഭാഗികമായും പ്രതിരോധ കുത്തിവയ്പ് എടുത്തവരും മൂന്ന് പേര്‍ക്ക് വാക്സിനുകള്‍ എടുക്കാത്തവരുമാണ്. എംആര്‍ വാക്സിന്‍ എടുത്ത കുട്ടികളില്‍ ഗുരുതരമായ കൊവിഡ് അണുബാധയ്ക്കുള്ള സാധ്യത വളരെ കുറവാണെന്നും പഠനം ചൂണ്ടിക്കാട്ടുന്നു. MMR വാക്‌സിന്‍ കൊവിഡ് വ്യാപനത്തില്‍ നിന്നും മരണനിരക്കില്‍ നിന്നും ശക്തമായ സംരക്ഷണം നല്‍കിയേക്കാം എന്നും പഠനം കൂട്ടിച്ചേര്‍ത്തു.