പ്രായപൂര്‍ത്തിയാകാത്ത പെണ്‍കുട്ടിയുടെ വിവാഹം നടത്താന്‍ നീക്കം:കോടതി ഇടപെട്ട് തടഞ്ഞു

പെരുമ്പടപ്പ്: പ്രായപൂര്‍ത്തിയാകാത്ത പെണ്‍കുട്ടിയുടെ വിവാഹം നടത്താനുള്ള നീക്കം തടഞ്ഞ് പൊലീസ്.പെരുമ്പടപ്പ് ബ്ലോക്കിന് കീഴിലെ ശൈശവ വിവാഹ നിരോധന ഓഫിസറുടെ നേതൃത്വത്തില്‍ ആണ് വിവാഹം തടഞ്ഞത്. പെണ്‍കുട്ടിയുടെ വിവാഹ നിശ്ചയം തിങ്കളാഴ്ച നടത്തുന്നുവെന്ന വിവരത്തിന്റെ അടിസ്ഥാനത്തിലാണ് ഉദ്യോഗസ്ഥര്‍ വീട്ടിലെത്തി രക്ഷിതാക്കളുമായി ചര്‍ച്ച നടത്തിയത്. എന്നാല്‍ വിവാഹവുമായി മുന്നോട്ടു പോകുമെന്ന നിലപാടില്‍ രക്ഷിതാക്കള്‍ ഉറച്ചു നിന്നതോടെ ശൈശവ വിവാഹ നിരോധന ഓഫിസര്‍ ആശാ റാണി പൊന്നാനി മുന്‍സിഫ് മജിസ്‌ട്രേറ്റ് കോടതിയില്‍ റിപ്പോര്‍ട്ട് നല്‍കി. തുടര്‍ന്ന് മുന്‍സിഫ് മജിസ്‌ട്രേറ്റ് കോടതിയുടെ നിര്‍ദേശ പ്രകാരം പൊലീസ് എത്തി വിവാഹ നടപടികള്‍ നിര്‍ത്തിവെപ്പിക്കുകയായിരുന്നു.