‘ശിവശങ്കര്‍ സാറെ, എനിക്കും മക്കള്‍ക്കും അമ്മയ്ക്കും വിഷം തരൂ; മരിക്കാന്‍ സന്തോഷം’

മുഖ്യമന്ത്രിയുടെ മുന്‍ പ്രിന്‍സിപ്പല്‍ സെക്രട്ടറി എം.ശിവശങ്കറിനെതിരെ സ്വര്‍ണക്കടത്ത് കേസ് പ്രതി സ്വപ്ന സുരേഷ് വീണ്ടും രംഗത്ത്. പുതിയ ജോലിയെക്കുറിച്ചുള്ള വിവാദങ്ങള്‍ക്കു പിന്നിലും ശിവശങ്കറെന്നു സംശയിക്കുന്നു. എച്ച്ആര്‍ഡിഎസിന് ആര്‍എസ്എസ് ബന്ധമുള്ളതായി അറിയില്ല. താന്‍ ഉപദ്രവിക്കുമെന്ന പേടിയാണ് വിമര്‍ശകര്‍ക്ക്. ജീവിക്കാന്‍ അനുവദിക്കണമെന്ന് അത്തരക്കാരോട് അപേക്ഷിക്കുന്നതായും സ്വപ്ന സുരേഷ് പറഞ്ഞു. എച്ച്ആര്‍ഡിഎസിന് രാഷ്ട്രീയ ബന്ധമെന്ന ആരോപണം സ്വപ്ന തള്ളി. 'അവര്‍ നല്‍കിയ ഓഫര്‍ ഞാന്‍ സ്വീകരിക്കുകയായിരുന്നു. അവര്‍ക്ക് ആര്‍എസ്എസ് ബന്ധമുണ്ടോ എന്നൊന്നും എനിക്കറിയില്ല. ജീവിക്കാന്‍ നിവൃത്തി ഇല്ലാതെ നില്‍ക്കുന്ന എനിക്ക് ഫില്‍റ്റര്‍ ചെയ്‌തെടുക്കാന്‍ ഒരുപാട് അവസരങ്ങളൊന്നുമില്ല'- സ്വപ്ന പറഞ്ഞു. ശിവശങ്കറിനെതിരെ ഉന്നയിച്ച എല്ലാ ആരോപണങ്ങളിലും ഉറച്ചു നില്‍ക്കുന്നതായി പറഞ്ഞ സ്വപ്ന വിമര്‍ശനം കടുപ്പിച്ചു. 'ഇപ്പോഴത്തെ എല്ലാ ആരോപണങ്ങള്‍ക്കു പിന്നിലും എന്തൊക്കെയോ ഉദ്ദേശ്യങ്ങള്‍ ഉണ്ടെന്നാണ് കരുതുന്നത്. അതിനാല്‍ എനിക്ക് ശിവശങ്കര്‍ സാറിനോട് മാധ്യമങ്ങളിലൂടെ പറയാനുള്ളത്, നിങ്ങള്‍ക്ക് എന്നെ കൊല്ലാനുള്ള എല്ലാ അവകാശവുമുണ്ട്. നിങ്ങള്‍ വന്ന് എനിക്കും കുട്ടികള്‍ക്കും അമ്മയ്ക്കും കുറച്ചു വിഷം നല്‍കി കൊല്ലുക. നിങ്ങള്‍ നല്‍കുന്ന വിഷം കഴിച്ചു മരിക്കാന്‍ ഞങ്ങള്‍ക്ക് സന്തോഷമേയുള്ളൂ. അല്ലാതെ ഇങ്ങനെ ചെയ്യരുത്.'- സ്വപ്ന പറഞ്ഞു. ആക്ഷേപം ഉന്നയിക്കുന്ന നേതാക്കള്‍ക്കെതിരെയും അവര്‍ പൊട്ടിത്തെറിച്ചു. 'ഒരു സ്ത്രീയെ അല്ലെങ്കില്‍ ഒരു അമ്മയെ ജീവിക്കാന്‍ അനുവദിക്കാതെ വീണ്ടുംവീണ്ടും ദ്രോഹിച്ചു കൊണ്ടിരിക്കുന്നവരോട് ഉത്തരം പറയേണ്ട ആവശ്യമുണ്ടെന്ന് തോന്നുന്നില്ല. എന്നെ ഒന്നു ജീവിക്കാന്‍ അനുവദിക്ക്. ഞാന്‍ ആരെയും ഒരു രീതിയിലും ബുദ്ധിമുട്ടിക്കില്ല. ജോലിയില്‍ മാറ്റമൊന്നുമില്ലെന്നു കമ്പനി അറിയിച്ചിട്ടുണ്ട്'- സ്വപ്ന വ്യക്തമാക്കി.