‘കണ്ണൂരിലെ സമാധാന അന്തരീക്ഷം തകര്‍ക്കാന്‍ ശ്രമം; കൊലപാതകം യാദൃശ്ചികമല്ല’

കണ്ണൂരിലെ സമാധാന അന്തരീക്ഷം തകര്‍ക്കാന്‍ ശ്രമമെന്ന് സിപിഎം നേതാവ് എ.വിജയരാഘവന്‍. തലശേരി ന്യൂമാഹിക്കടുത്ത് പുന്നോലില്‍ സിപിഎം പ്രവര്‍ത്തകന്‍ ഹരിദാസ് കൊല്ലപ്പെട്ടതിനോട് പ്രതികരിക്കുകയായിരുന്നു അദ്ദേഹം. പാര്‍ട്ടി സംസ്ഥാന സമ്മേളനത്തിന്റെ പതാകദിനത്തില്‍ തന്നെ കൊലപാതകം നടത്താനുള്ള ആര്‍എസ്എസ് തീരുമാനം യാദൃശ്ചികമല്ലെന്നും അദ്ദേഹം പ്രതികരിച്ചു. 'സിപിഎമ്മിന്റെ ദേശീയ സമ്മേളനം കണ്ണൂരില്‍ നടക്കുന്നതിന്റെ ഭാഗമായുള്ള പ്രവര്‍ത്തനങ്ങള്‍ നല്ല രീതിയില്‍ നടന്നുവരുകയാണ്. സമാധാന അന്തരീക്ഷം തകര്‍ക്കുക എന്ന ഗൂഢാലോചനയാണ് ഈ ആക്രമണത്തിനു പിന്നിലുള്ളത്. ആക്രമണം സംഘടിപ്പിച്ചവരുടെ ലക്ഷ്യം നാട്ടില്‍ കലാപമുണ്ടാക്കലാണ്. ആര്‍എസ്എസ് അടയാളപ്പെടുത്തുന്നതുതന്നെ അക്രമത്തിലൂടെയാണ്. എല്ലാ സമാധാനകാംക്ഷികളും പ്രതിഷേധം രേഖപ്പെടുത്തേണ്ട ഒരു സംഗതിയാണിത്. സിപിഎമ്മിന്റെ സംസ്ഥാന സമ്മേളനത്തിന്റെ ഭാഗമായി പതാകദിനം ആചരിക്കുന്ന ദിവസം തന്നെ ആര്‍എസ്എസ് ആക്രമണം ആസൂത്രണം ചെയ്തത് യാദൃശ്ചികമല്ല. എല്ലാ വിഭാഗം ജനങ്ങളും ഇത്തരം തെറ്റായ നീക്കങ്ങള്‍ക്കെതിരെ പ്രതിഷേധിക്കാന്‍ തയാറാകണം. കുടുംബാംഗംങ്ങളുടെ മുന്നില്‍വച്ചാണ് ഈ അക്രമം എന്നത് ആര്‍എസ്എസിന്റെ ക്രൂരതയുടെ ഏറ്റവും വലിയ ഉദാഹരണമാണ്'- വിജയരാഘവന്‍ പറഞ്ഞു. മല്‍സ്യത്തൊഴിലാളിയായ ഹരിദാസ് ജോലി കഴിഞ്ഞ് മടങ്ങുമ്പോള്‍ പുലര്‍ച്ചെ ഒന്നരയോടെ വീടിനടുത്തുവച്ചായിരുന്നു കൊല്ലപ്പെട്ടത്. രണ്ടു ബൈക്കുകളിലെത്തിയ സംഘമാണ് ആക്രമിച്ചതെന്നാണ് സൂചന. മൃതദേഹം പരിയാരം മെഡിക്കല്‍ കോളജിലേക്കു മാറ്റി.