മകന്‍ യമനിലെ ഹൂതിവിമതരുടെ തടങ്കലില്‍; മരുമകള്‍ യുക്രൈനിലും; യുദ്ധഭീതിയില്‍ ഉരുകി ആലപ്പുഴയിലെ കുടുംബം

യുദ്ധങ്ങള്‍ സമ്മാനിക്കുന്നത് വേദനകള്‍ മാത്രമാണ്. യുദ്ധത്തിലേര്‍പ്പെടുന്ന രാജ്യങ്ങള്‍ക്കപ്പുറം ആ നോവ് എല്ലായിടത്തും പടരും. രണ്ട് യുദ്ധങ്ങളുടെ ഇടയിലകപ്പെട്ട് ജീവിതം തള്ളി നീക്കുകയാണ് ആലപ്പുഴയിലെ രണ്ട് കുടുംബങ്ങള്‍. ഏവൂര്‍ സ്വദേശി രഘുവിന്റെ മകനും മരുമകളുമാണ് യുദ്ധത്തിന്റെ ഇരകളായി നാട്ടിലെത്താനാകാതെ കുടുങ്ങി കിടക്കുന്നത്. മകന്‍ അഖില്‍ രണ്ട് മാസമായി യെമനില്‍ ഹൂതിവിമതരുടെ തടങ്കലിലാണ്. ഉടനെ മോചിതനാകുമെന്ന് പ്രതീക്ഷിച്ചിരിക്കുകയായിരുന്നു. അതിനിടയിലാണ് അഖിലിന്റെ ഭാര്യയും എംബിബിഎസ് അവസാന വര്‍ഷ വിദ്യാര്‍ത്ഥിനിയുമായ ജിതിന യുക്രൈനില്‍ അകപ്പെട്ടത്. കീവില്‍ അകപ്പെട്ട ജിതിന വീട്ടുകാരുമായി ഇടയ്ക്ക് ബന്ധപ്പെടുന്നുവെന്നത് കുടുംബത്തിന് നല്‍കുന്ന ആശ്വാസം ചെറുതല്ല. അപൂര്‍വമായി മാത്രമാണ് ബന്ധിയായതിന് ശേഷം അഖില്‍ വീട്ടിലേക്ക് വിളിച്ചിട്ടുള്ളത്. യുഎഇയിലെ ലിവാമറൈന്‍ കമ്പനിയുടെ കപ്പലിലായിരുന്നു അഖിലിന് ജോലി. കപ്പല്‍ തട്ടിയെടുത്ത ഹൂതിവിമതര്‍ അഖിലടക്കമുള്ള ജീവനക്കാരെ ബന്ദികളാക്കി. ഇനിയെന്നാണ് മോചനമെന്ന് ഇപ്പോഴും ഈ കുടുംബങ്ങള്‍ക്ക് അറിയില്ല. നാട്ടിലേക്ക് മടങ്ങാന്‍ ടിക്കറ്റ് ഉള്‍പ്പെടെ ശേഖരിച്ചിരുന്നു ജിതിന. ഇനിയെന്നു നാട്ടിലെത്തുമെന്നും വ്യക്തതയില്ല. ജീവനോപാധിതേടിയും പഠനം മുന്നില്‍കണ്ടുമൊക്കെ രാജ്യം കടന്ന എത്രയോ മനുഷ്യര്‍ക്കൊപ്പം അവരുടെ ഉറ്റവരും തേങ്ങി കരയുന്നുണ്ട്.