സ്‌കൂള്‍ ബസ് ഡ്രൈവറില്ലാതെ ഇറക്കത്തിലേക്ക്; ചാടിക്കയറി ബ്രേക്കിട്ട് അഞ്ചാം ക്ലാസുകാരന്‍

ഡ്രൈവറില്ലാതെ നീങ്ങിയ സ്‌കൂള്‍ ബസില്‍ രക്ഷകനായി അഞ്ചാം ക്ളാസുകാരന്‍. മുതിര്‍ന്ന വിദ്യാര്‍ഥികള്‍ പകച്ചുനില്‍ക്കേ, ഡ്രൈവറുടെ സീറ്റിലിരുന്ന് ബ്രേക്ക് ചവിട്ടി ബസ് നിര്‍ത്തുകയായിരുന്നു. ശ്രീമൂലനഗരം അകവൂര്‍ സ്‌കൂളിലെ വിദ്യാര്‍ഥി ആദിത്യന്‍ രാജേഷാണ് സഹപാഠികള്‍ക്ക് മുന്നില്‍ ഹീറോ ആയത്. തിങ്കളാഴ്ച വൈകീട്ടായിരുന്നു സംഭവം. സ്‌കൂളില്‍ നിന്നും റോഡിലേക്ക് ഇറക്കമുണ്ട്. ഇവിടെ നിര്‍ത്തിയിട്ട ബസില്‍ വിദ്യാര്‍ഥികള്‍ കയറിയപ്പോഴാണ് താഴോട്ട് ബസ് പതിയെ നീങ്ങിയത്. നിറയെ വിദ്യാര്‍ഥികള്‍ ബസില്‍ കയറിയപ്പോഴായിരുന്നു സംഭവം. ഭയംകൊണ്ട് വിദ്യാര്‍ഥികളില്‍ പലരും നിലവിളിച്ചു. ഏതാനും വിദ്യാര്‍ഥികള്‍ ഇതിനിടെ ബസില്‍ നിന്ന് ചാടിയിറങ്ങി. അപകടം തിരിച്ചറിഞ്ഞ ആദിത്യന്‍ പകച്ചുനില്‍ക്കാതെ വേഗത്തില്‍ ഇടപെടുകയായിരുന്നു. വേഗം കൂടിയതോടെ ആദിത്യന്‍ ഡ്രൈവര്‍സീറ്റിലെത്തി ബസ് ബ്രേക്ക് ചവിട്ടി നിര്‍ത്തി. സാമൂഹികമാധ്യമങ്ങളില്‍ വന്നതോടെയാണ് ആദിത്യന്റെ രക്ഷാപ്രവര്‍ത്തനം കൂടുതല്‍ പേര്‍ അറിഞ്ഞത്. ഇതോടെ വിവിധ മേഖലകളില്‍ നിന്ന് ആദിത്യനെത്തേടി അഭിനന്ദനപ്രവാഹമാണ്. ക്രഷറില്‍ ജോലിചെയ്യുന്ന അമ്മാവന്റെ കൂടെ ടോറസില്‍ യാത്രചെയ്തിട്ടുണ്ടെന്നും വണ്ടിയുടെ ആക്സിലറേറ്ററും ബ്രേക്കും ഏതെന്ന് തിരിച്ചറിയാമായിരുന്നുവെന്നും ആദിത്യന്‍ പറഞ്ഞു. അതിനാലാണ് പെട്ടെന്ന് ഇടപെടാനായത്. ശ്രീഭൂതപുരം വാരിശ്ശേരി രാജേഷിന്റെയും മീരയുടേയും മകനാണ്.