കരിങ്കല്ലുകള്‍ക്കിടയില്‍ കുടുങ്ങി എട്ടു വയസ്സുകാരന്‍; 3 മണിക്കൂറിന് ഒടുവില്‍ രക്ഷ

വടകരയില്‍ കടപ്പുറത്തെ കരിങ്കല്ലുകള്‍ക്കിടയില്‍പ്പെട്ട എട്ടു വയസ്സുകാരനെ മൂന്നു മണിക്കൂര്‍ നീണ്ട പരിശ്രമത്തിനൊടുവില്‍ രക്ഷിച്ചു. ശനിയാഴ്ച വൈകിട്ട് സുഹൃത്തുക്കള്‍ക്കൊപ്പം വീടിനു സമീപം കളിക്കുന്നതിനിടെയാണ് ഷിയാസ് (8) അപകടത്തില്‍പ്പെട്ടത്. കരിങ്കല്ലുകള്‍ക്കിടയില്‍ പോയ പന്ത് എടുക്കാനുള്ള ശ്രമത്തിനിടെ ഷിയാസും കല്ലുകള്‍ക്കിടയിലേക്കു വീഴുകയായിരുന്നു. മറ്റു കുട്ടികള്‍ ബഹളംവച്ചതിനെ തുടര്‍ന്ന് നാട്ടുകാര്‍ ഓടിയെത്തി. അഗ്‌നിരക്ഷാ സേനാ ഉള്‍പ്പെടെയുള്ളവരും സ്ഥലത്തെത്തി. എന്നാല്‍ കരിങ്കല്‍ കുട്ടിയുടെ ദേഹത്തു വീഴാന്‍ ഉള്‍പ്പെടെ സാധ്യതയുണ്ടായിരുന്നതിനാല്‍ അതീവശ്രദ്ധയോടെയായിരുന്നു രക്ഷാപ്രവര്‍ത്തനം. മൂന്നു മണിക്കൂര്‍ നീണ്ട പരിശ്രമത്തിനൊടുവിലാണ് കുട്ടിയെ പുറത്തെടുത്ത്. കുട്ടിയുടെ ആരോഗ്യനില തൃപ്തികരമാണ്.